Këtë javë ministrat e jashtëm të Bullgarisë, Greqisë dhe të Rumanisë u morën vesh në Sofje për të punuar së bashku për ruajtjen e niveleve të politikës së kohezionit, të propozuara nga Komisioni Evropian. Një ditë më vonë kryeministri Bojko Borisov deklaroi në Bruksel se qeveria do të kërkojë livrimin e 500 mln eurove suplementare për periudhën tjetër programore të Bullgarisë. Para takimit të jashtëzakonshëm të Këshillit Evropian gjatë nëntorit, në të cilën do të diskutohet buxheti i BE-së për periudhën 2014-2020, Bullgaria ngul këmbë për më shumë mjete evropiane për periudhën tjetër programore nga ajo e tanishme.

Në kontekstin e cakut shumëvjeçar financiar dhe politikës së kohezionit të BE-së për periudhën 2014-2020 Bullgaria ngul këmbë që vendet më pak të zhvilluara në BE të marrin një përqindje më të madhe të mjeteve të fondit të kohezionit. Kauza e dytë e vendit tonë në debatin për cakun e ardhshëm financiar të BE-së është ruajtja e nivelit të financimit të politikës së ardhshme bujqësore (pagimet për prodhuesit bujqësorë), kurse ajo e tretë është sigurimi i financimit suplementar prej 450 mln eurosh për heqjen nga eksploatimi të reaktorëve bërthamorë të Centralit atomik “Kozlloduj”.

Duke pasur parasysh kundërvënien e shteteve më të pasura në bashkim ndaj rritjes së buxhetit të BE-së, qëllimet e vendit tonë në lidhje me buxhetin e ardhshëm të Bashkimit, nuk mund të arrihen lehtë. Duke iu kundërvënë qëndrimit për kufizimin e buxheteve të ardhshme të BE-së, vendi ynë u argumentua se fondet e kohezionit i shërbejnë tërë Evropës dhe jo vetëm kombeve të veçanta. Kryeministri bullgar Bojko Borisov theksoi se zakonisht konkurset për projektet në një shtet fitohen nga firmat e shteteve të tjera dhe kështu një pjesë e mjeteve evropiane rikthehen në vendet përkatëse. Nga ana tjetër, infrastrukturat e realizuara me mjetet evropiane në një shtet përdoren dhe nga shtetet e tjera evropiane për transportimin e mallrave për kontinentet e tjera.

Më këto teza Bullgaria gjendet në të ashtuquajturin grup “Miq të politikës së kohezionit”, kundër të cilit është grupi “Vendet donatore neto”. Grupi i parë ka një përkrahje të madhe nga ana e Parlamentit Evropian dhe e Komisionit Evropian, por në vetë grupin e miqve të politikës së kohezionit nuk ka pajtim sa u përket kushteve makroekonomike, sipas të cilave vendet do të marrin mjetet nga fondet. Në këtë drejtim Bullgaria mendon se ka nevojë për rezultate të mira nga investimet e deritanishme dhe disiplinë të rreptë financiare, që të ketë argumente të fuqishme para vendeve-donatorë.

Deri në mbledhjen e jashtëzakonshme të Këshillit Evropian më 22 dhe 23 nëntor të vitit 2012, kushtuar cakut shumëvjeçar financiar të BE-së, mbeten disa ditë. Ndërkohë nuk është arritur kompromis në debatet paraprake. Bullgaria vazhdon të përkrahë pozitën e saj të parë se buxheti i BE-së nuk duhet të pakësohet, sepse në rast se miratohet oferta e kryesisë së Qipros për shkurtim të 50 mlrd eurosh, ajo do të jetë ndër vendet më të prekura. Bullgaria do të marrë pjesë në mbledhjen e jashtëzakonshme me shpresën se do të arrihet një kompromis i arsyeshëm, sepse, siç paralajmëroi ministri i jashtëm Nikollaj Mlladenov, në qoftë se Bashkimi Evropian nuk arrin pajtim, ai do të dërgojë sinjale negative ndaj shtetasve evropianë se nuk është i aftë për të marrë vendimet e domosdoshme në momentet vendimtare.

Përgatiti në shqip: Vesella Mançeva