Rumen Radev njoftoi se nga 20 tetori i këtij viti do të udhëtojë për punë me makinën e tij personale. "Kur të miratojnë një ligj që i detyron njerëzit të bëjnë punë shtetërore me makina personale, unë do të jem në solidaritet me ta", e justifikoi ai vendimin e tij.

Vendimi i kreut të shtetit vjen në përgjigje të ndryshimeve legjislative, sipas të cilave makinat e Shërbimit Kombëtar të Sigurisë nuk do të jenë më në dispozicion të administratës së institucionit presidencial.

Rumen Radev u bëri thirrje deputetëve të zbresin nga limuzinat: "Në këtë mënyrë, disa prej tyre më në fund do të njihen me votuesit e tyre".

Ndërkohë, "DPS - Fillimi i Ri" propozoi mundësinë që Kryetari i Asamblesë Kombëtare, Presidenti dhe Kryeministri të jenë në gjendje të heqin dorë nga siguria e tyre personale përmes një ndryshimi në Ligjin për Shërbimin Kombëtar të Sigurisë. "Ndryshimi është në përgjigje të kërkesës së Presidentit Rumen Radev se ai dëshiron të heqë dorë nga siguria e tij, por ligji nuk e lejon", thuhet në deklaratën e partisë, të cituar nga BTA.

Redaktoi: Diana Cankova

Përgatiti në shqip dhe publikoi: Vesella Mançeva

Foto: BTA