Takimi konsultativ i nivelit të lartë i thirrur nga Presidenti Rumen Radev në lidhje me ftesën e pritur gjatë tetorit ndaj Maqedonisë së Veriut për nisjen e negociatave për anëtarësim në BE përfundoi me vendim për hartimin e pozitës kombëtare për këtë çështje me kërkesa dhe kritere të sakta, të cilat duhet t’i mbrojnë interesat kombëtare bullgare.
Sipas pjesëmarrësve këto kërkesa duhet të bëhen pjesë e kornizës së negociatave dhe një nga kushtet e detyrueshme për aderimin e vendit në BE.
Presidenti shpjegoi se është me rëndësi të madhe që të vizatohen “vija të kuqe”, të cilat do të garantojnë se integrimi evropian i Maqedonisë së Veriut nuk do të jetë për llogari të historisë, gjuhës dhe identitetit bullgar.
Kryeministri Bojko Borisov tha se përkrahja e Sofjes për të ardhmen evropiane të Shkupit kurrë nuk ka qenë pa kushte dhe Maqedonia e Veriut nuk duhet ta humbë këtë mundësi. Bullgaria insiston që negociatat e BE-së me Maqedoninë e Veriut të zhvillohen bashkë me ato me Shqipërinë, sqaroi Borisovi.
