Sofja do të ketë një uzinë për përpunim dhe përdorim, dhe jo për djegie të mbeturinave

botuar më 10-03-24 10.25.PD

Në fund të marsit Bullgaria i dërgon për miratim Komisionit Evropian një projekt për ndërtim të një sistemi të integruar për përpunim dhe përdorim të mbeturinave të kryeqytetit. Investimi i përgjithshëm është 183 milionë euro, prej të cilave Programi operativ për mjedisin i KE-së do të japë 111 milionë euro. Mjetet e tjera Bashkia e Sofjes do t’i marrë si hua nga Banka Evropiane e Investimeve – 50 milionë euro, dhe nja 20 milionë si bashkëfinancim nga buxheti i shtetit.

Kështu do të përfundojë kriza dhjetëvjeçare me plehrat e Sofjes, pasi në fillim të shekullit e vetmja depo në Suhodol u bë plot e përplot dhe plehrat e kryeqytetit transportoheshin në plehërishta të tjera të vendit. Zgjatja e këtij problemi ka dhe një anë të mirë. Ndërkohë BE miratoi direktiva për drejtim të plehrave të qyteteve, të cilat inkurajojnë metoda të tjera trajtimi përveç djegies, e cila i shkakton dëme mjedisit. Kështu Sofja hoqi dorë nga ndërtimi i uzinës për djegie të plehrave dhe u orientua drejt teknologjive më racionale për përdorimin e tyre. Çfarë është vendimi përfundimtar i Bashkisë së kryeqytetit, për Radio Bullgarinë sqaroi Petër Trajkov, drejtor i departamentit “Mjedisi” pranë Bashkisë së Sofjes:

“Vendimi përfundimtar parashikon ndërtimi i një instilacioni për trajtim mekanik dhe biologjik të plehrave, me prodhim të lëndës djegëse biologjike dhe deponim të mbeturinave të papërdorueshme. Në një shesh tjetër do të ndërtohet dhe një instilacion për mbeturina biologjike. Produkti i fundit do të jetë një kompost shumë i mirë që mund të përdoret në bujqësi.”

Banorët e kryeqytetit hedhin çdo ditë afro 500 tonë plehra, një pjesë e madhe prej të cilave është biomasë, më tepër mbeturina nga kuzhina. Kjo i detyrohet faktit se në Bullgari ushqimi gatuhet më shumë në shtëpi dhe përdorimi i ushqimeve të gatshme është më i vogël se sa në kryeqytetet e tjera evropiane. Atje biomasa është nën 10%, kurse problemi kryesor është grumbullimi i madh i paketimeve. Në Sofje situata është e kundërta dhe kjo paracakton rëndësinë e teknologjive të përpunimit të biomasës.

“Pjesa e saktë e biomasës është rreth 60% - thotë zoti Trajkov. – 20-25% prej tyre janë me potencial për një përpunim të mëtejshëm për një kompst me cilësi të larta. Këto janë mbeturinat e gjelbra të lagjeve periferike, si edhe mbeturinat bimore të parqeve të Sofjes. Por ka dhe një pjesë të biomasës, e cila nuk mund të përfshihet në këtë sistem për përpunim, sepse prej saj do të prodhohet një kompost me cilësi të ulët. Një pjesë prej saj do të deponohet, kurse një pjesë tjetër do të përdoret për rekultivim të terreneve shumë të dëmtuara.”

Projekti parashikon dhe ndërtimin e një depoje për mbeturina të parrezikshme, sipas standardeve evropiane në këtë fushë. “Realizimi i projektit është lidhur me krijimin e një sistemi për mbledhje të ndarë të plehrave dhe me vëmendje të posaçme do të mblidhen paketimet e pajisjeve elektrike dhe elektronike, bateri dhe sende të tjera të ngjashme.”

Për shkak të krizës së gjatë me mbeturinat e Sofjes, në fund të vitit 2007 KE nisi një procedurë ndëshkuese kundër Bullgarisë. Zgjidhja e shpejtë e kësaj çështjeje është prioritet si i administratës së kryeqytetit, ashtu edhe i qeverisë. Për këtë shkak, qysh para miratimit të projektit, Bashkia e Sofjes filloi me mjete të veta ndërtimin e infrastrukturës së nevojshme për objektet – rrugë, ujësjellës, stacione pastrimi. Kështu do të kursehet kohë derisa do të zgjaten procedurat e ngadalta të miratimit të projektit nga KE-ja. Pritet që ndërtimi i vetë instalacioneve të përpunimit të fillojë në fund të vitit 2010 dhe ato të hapen për eksploatim gjatë vitit 2012.

Përgatiti në shqip: Ekaterina Tarpomanova

По публикацията работи: Maria Dimitrova

Последвайте ни и в Google News Showcase, за да научите най-важното от деня!

Ndaje

Sofja do të ketë një uzinë për përpunim dhe përdorim, dhe jo për djegie të mbeturinave

Më shumë nga rubrika

Bullgarët e vetëshpallur në Maqedoninë e Veriut janë shumë më tepër se ata të regjistruar

Si do të ndikojë në BE rezultati i zgjedhjeve presidenciale në SHBA

Nënpresidentja Ilijana Jotova hapi një ekspozitë për Trakinë e lashtë në Muzeun Getty

Nënpresidentja Ilijana Jotova hapi një ekspozitë për Trakinë e lashtë në Muzeun Getty

Si do të ndikojë në BE rezultati i zgjedhjeve presidenciale në SHBA

Bullgarët e vetëshpallur në Maqedoninë e Veriut janë shumë më tepër se ata të regjistruar