Ju njohim me disa prej muzikantëve të njohur bullgarë – interpretues të muzikës popullore bullgare, të cilët kanë lindur gjatë muajit dhjetor.

Hristo Kësijotov nga Ugërçini i rrethit të Lloveçit është ndër muzikantët e parë në Orkestrën e krijuar në vitin 1952 për muzikë popullore pranë Radios Kombëtare Bullgare. Është i njohur si tamburist dhe gajdexhi. Ai ka lindur në vitin 1921 dhe ka punuar në orkestër në vazhdim të tri dekadave, ka dhënë shumë koncerte te ne dhe jashtë. Përveç si instrumentist Hristo Kësijotov është i njohur gjithashtu si mësues i tamburasë në ansamblin për fëmijë “Izvorçe”. Shumë prej nxënësve të tij sot janë profesionistë të shquar.

Bojka Prisadova ka lindur në vitin 1944 në fshatin Vërbovo të rrethit të Smoljanit. Krijimtaria e saj është lidhur me folklorin e Rodopeve. Është mbajtëse e shumë çmimeve. Një prej tyre është shumë i vlershëm për këngëtaren. Ky është çmimi i parë i Radio-konkursit të XVI-të ndërkombëtar në Bratislavë.

Dafinka Damjanova ka lindur në vitin 1956 në qytetin Kotell. Është këngëtare në korin “Misteri i zërave bullgarë” dhe mësuese e këndimit popullor. Një prej instrumentistëve të njohur të muzikës popullore është gajdexhiu Neno Ivanov. Ai ka lindur në vitin 1931 në Drallfa të rrethit të Tërgovishtes. Ai është një prej themeluesve të Orkestrës popullore pranë Radios Kombëtare Bullgare dhe pedagog i shquar.

Kostadin Varimezov gjithashtu është një gajdexhi i njohur bullgar. Ai ka lindur në vitin 1918 në fshatin e Stranxhës – Rosenovo. Është i njohur si një prej interpretuesve më të mirë të muzikës popullore bullgare. Ka dhënë koncerte në katër kontinente, ka punuar si pedagog në universitetin në Toronto, në shkollat e ansamblit “Izvorçe”, në shkollën e Kotelit. Shumë prej nxënësve të tij sot janë muzikantë të shquar. Një prej tyre është Timoti Rajs, profesor në Universitetin e Kalifornisë në Los Anxhelos, adhurues i madh i muzikës popullore bullgare.

Nikolla Vaklinov ka lindur në vitin 1948 në Dupnica. Krijimtaria e tij është lidhur me ansamblin maqedonas “Goce Dellçev” të Sofjes. Nikolla Vaklinov është kompozitor dhe dirigjent i ansamblit të njohur bullgar. 20 vjet ka punuar në Radio Bllagoevgrad, ka punuar gjithashtu për Televizionin Kombëtar Bullgar dhe formacionin “Të gjithë bullgarët së bashku”. Radioja Kombëtare Bullgare ruan shumë prej përpunimeve të tij melodike të këngëve popullore bullgare nga Bullgaria Jugperëndimore.

Për t’i dëgjuar interpretimet e këtyre muzikantëve klikoni AUDIO.

Përgatiti në shqip: Vesella Mançeva
Fotografi: arkiv