Kriza në Irak nuk ka vetëm karakter humanitar, por kërcënon sigurinë e kufijve të jashtëm të BE-së, përfshi këtu dhe Bullgarinë, deklaroi ministri i jashtëm teknik i Bullgarisë Daniell Mitov gjatë pjesëmarrjes së tij të parë në mbledhjen e Këshillit “Punët e Jashtme”. Ministrat e jashtëm të BE-së patën një takim të jashtëzakonshëm në Bruksel, që të diskutojnë situatën humanitare në Irak, që po thellohet gjithnjë e më shumë, dhunën në rritje në Libi dhe pasojat negative të konflikteve në Ukrainë dhe Lindjen e Mesme, duke e vënë theksin te zhvillimi i ngjarjeve në rripin Gazë. Ditën e hënë ministri i jashtëm teknik shpalli pozitën e vet gjatë Këshillit, derisa prezantonte anëtarët e kabinetit të tij politik.

“Për herë të parë jemi dëshmitarë të krizave të nivelit 3, sipas vlerësimit të OKB-së, sidomos kur të bëhet fjalë për Irakun, vazhdoi ministri Mitov. - Do të kemi problem lidhur me fluksin e refugjatëve. Por edhe sukseset ushtarake të “Shtetit të vetëshpallur Islamik” nuk mund të injorohen. Të gjitha shtetet-anëtare duhet të bëjmë përpjekje, që t’i vëmë fund kësaj murtaje. U shpreh gatishmëri për përkrahje ndaj forcave kurde të sigurisë dhe i ishte bërë thirrje çdo një prej shteteve për të siguruar ndihmë humanitare, sipas mundësive individuale.”

Me rastin e publikimit nga data 15 gusht të gazetës “Bild” se Bundesveri ka një plan sekret për t’i armatosur kurdët irakianë me automatë “Kalashnikov” nga Bullgaria dhe Rumania, ministri Daniell Mitov komentoi:

“Është e qartë se BE-ja dhe shtetet-anëtare janë shqetësuar shumë për ngjarjet në Irak, vazhdoi ai. - Franca tashmë dërgoi ndihmë të saj ushtarake, Gjermania gjithashtu do të dërgojë një ndihmë të tillë, kjo ishte deklaruar qartë. Çekia është duke menduar mbi dërgimin e një ndihme të tillë, edhe Britania e Madhe do të përfshihet. Tani për tani në Bullgari nuk është marrë vendim mbi këtë çështje dhe po të ketë pyetje zyrtare, çështja duhet të shqyrtohet dhe të merret vendim a kemi një mundësi të tillë apo jo.”

Ministri Mitov komentoi gjithashtu se “Rusia mban përgjegjësinë e madhe për destabilizimin e Ukrainës. Ndërkaq, u theksua se Kivei duhet të diskutojë sanksionet ndaj Rusisë edhe me partnerët e tij evropianë.”

“Rusia duhet të kuptojë se veprimet e saj janë kundërproduktive. Shpresojmë se do të rimëkëmbet dialogu BE-ja-Ukraina-Rusia dhe se në saje të takimeve të nivelit të lartë do të arrihet një vendim në të ardhmen, vazhdoi ministri i jashtëm teknik i Bullgarisë. – Shpresojmë se nuk do të vendosen më shumë sanksione, por kjo nuk do të thotë se në rast rritjeje të konfliktit nuk do të ofrohen sanksione të tilla”.

Në Këshillin e jashtëzakonshëm të ministrave të jashtëm u arrit pozita kategorike për solidaritet në kuadrin e BE-së për përballimin e pasojave të ndalimit rus të importit të mallrave bujqësore. Pritet që së shpejti të zhvillohet dhe një këshill i ministrave bujqësorë të BE-së, ku do të komentohen dhe caktohen kompensimet e bujqve si rrjedhim i embargos.

Përkrahja ndaj nominimit të Kristalina Georgievës për një mandat të dytë si anëtare e Komisionit Evropian dhe përfaqësuese supreme e politikës së përgjithshme të jashtme dhe politikës së sigurimit është ndër prioritetet kryesore të ekipit të ministrit Daniell Mitov.

“Ne tashmë jemi duke punuar mbi realizimin e këtij qëllimi, jemi duke u koordinuar me partnerët tanë nga BE-ja, vuri në dukje ministri. - Duhet të shënojmë se zonja Kristalina Georgieva gëzon një autoritet të jashtëzakonshëm në Evropë, një autoritet që e ka fituar vetë. Ajo është ndër njerëzit, për të cilët nuk mund të flitet negativisht në Evropë dhe gëzon një respekt të madh, gjë që është një kapital i madh për Bullgarinë.”

Në rast se ky vend u jepet specialistëve evropianë, atëherë Bullgaria do të ngulë këmbë që Kristalina Georgievës t’i jepet një resor, i cili të jetë ndër një prej resorëve me prioritet për BE-në, shtoi Daniell Mitov.

Organizimi i procesit zgjedhor jashtë dhe përgatitja e Bullgarisë për kryesinë e BE-së në vitin 2018 – këto janë prioritetet e tjera kryesore në punën e Ministrisë së Punëve të Jashtme në kuadrin e mandatit të qeverisë teknike, deklaroi ministri Daniell Mitov.

Përgatiti në shqip: Vesella Mançeva