Pikërisht në vende të tilla merren vendime për politikat për investime dhe zhvillim. Vetë fakti se Bullgaria kurrë deri tani nuk ka qenë e pranishme në një ngjarje të tillë është humbje e mundësive të mëdha dhe e branding-ut. Derisa Bullgaria paraqitej nëpërmjet fondacionit tonë, India, Koreja, Mongolia dhe Rusia gjithashtu kishin aktivitete të organizuara nga vetë shteti, si dhe nga disa korporata të mëdha. Mirëpo, paraqitja jonë tërhoqi më shumë veta dhe ata ishin prej më të dëshiruarve nga të gjitha këtyre 2500 veta. Patëm mbi 600 vizitues. Ne arritëm nëpërmjet marketingut të përshtatshëm, metodës dhe kontakteve tona të mira të tërheqim liderë globalë, të cilët në fund të aktivitetit hodhën valle bullgare. Ishte shumë bukur dhe unë krenohem për ekipin tonë, se e ndryshuam konceptin dhe nuk reklamuam WEBIT, por reklamuam Bullgarinë. Në vende të tilla zihen miqësi, të cilat në vazhdim mund të jenë shumë të dobishme. Mirëpo, qëllimi ynë ishte për të vendosur kontakte miqësore dhe këta miq të vijnë në Bullgari, që të shohin se këtu gjithashtu ka njerëz të jashtëzakonshëm dhe ide të shkëlqyeshme, të cilët duhet të përkrahen.

Nga 18 deri më 20 prill në Sofje do të mbahet WEBIT.FESTIVAL, për të cilin Pllamen Rusev na premtoi:

Ai do të jetë i jashtëzakonshëm. Sivjet Sofja është vendi i aktivitetit tonë evropian. Kemi edhe përkrahjen e Komisionit Evropian. Këtu do të mbërrijnë politikanë të nivelit më të lartë. Do të ndihmojmë në debatin dhe takimet me biznesin, por edhe me njerëzit e rretheve akademike. Për herë të parë në Bullgari do të organizojmë të ashtuquajturat “ngjarje policy” – këto nuk janë aktivitetet politike, por aktivitete për politika. Do të flasim se si mund të zhvillohet komuniteti i ndërmarrësve në Evropë, do të shqyrtojmë kiber-sigurinë, problemin demografik në Evropë, mënyrën shëndetësore të jetesës nëpërmjet bio-teknologjive, transformimin digjital... Kemi një aktivitet, të quajtur “Qytetet e mençura evropiane”, në të cilin do të takohen shumë kryetarë bashkie nga Evropa. Kjo është një fushë, në të cilën biznesi mund të jetë në dobi të madhe, duke e përmirësuar transportin dhe administratën. Do të mbahen edhe ngjarjet tona tradicionale, kushtuar industrisë – ato për iniovacionet dhe për marketingun digjital. Kemi një degë të veçantë vetëm për kompanitë që tani po e startojnë veprimtarinë e tyre. Do të ndihmojmë rreth 150 kompani nga mbarë Evropa, që të mund të kenë ato një stend të veçantë. Këto janë tri shtyllat kryesore të kongresit – ngjarjet për politikat, për industrinë dhe për kompanitë e porsakrijuara.

Çfarë do të jetë dobia për Bullgarinë nga kjo iniciativë?

Strategjia jonë është që Bullgaria të bëhet bashkuese e shteteve nga Evropa Qendrore dhe Lindore. Ne jemi mikpritës dhe Bullgaria do të shihet, por meqenëse Evropa ka nevojë për vendime në shumë sfera, është me rëndësi që të gjithë pjesëmarrësit të japin kontributin e tyre. Për shembull Sofja ka një prej eko-sistemeve më aktive startëp në Evropë dhe ne e arritëm këtë në kuadrin e 4-5 viteve. Kështu qe do të mund të japim shembuj të mirë edhe në këtë drejtim, kurse përfaqësuesit e shteteve të tjera do të mund të tregojnë se ku janë arritjet e tyre. Imazhi teknologjik i vendit tonë jashtë është shumë i lartë. Ne jemi shumë të lumtur se para një jave u votua dhe Sofja miratoi ofertën tonë për t’u quajtur “Kryeqyteti digjital i tregjeve të reja”. Kjo u bë një pjesë e strategjisë së qytetit për specializimin inteligjent dhe ne do të punojmë që kjo të bëhet realitet.

Përgatiti në shqip: Vesella Mançeva