Ministri i Jashtëm i Luksemburgut Jean Asselborn deklaroi pasi u takua në Sofje me homologen e tij bullgare Ekaterina Zaharieva se Dukata e Madhe do të bëjë çmos që të bëhet Bullgaria anëtare e sistemit Shengen sa më shpejt. Sipas Ministrit Asselborn në qoftë se ky hap nuk bëhet në BE kjo do të thotë se ka diskriminim ndaj Bullgarisë. Ministrja Zaharieva komentoi se megjithëse tregtia dypalëshe nuk është e një niveli të lartë Luksemburgu është një prej investitorëve më të mëdhenj në Bullgari. Zaharieva vuri në dukje gjithashtu se sipas të dhënave jozyrtare në Luksemburg banojnë rreth 5 000 bullgarë, të cilët janë integruar shumë mirë dhe zënë pozita të larta, gjë që për mendimin e saj është një rrethanë e favorshme për zhvillimin e marrëdhënieve dypalëshe.