Pas konfirmimit përfundimtar të 4 rasteve të koronavirusit në Bullgari, në një mbledhje të jashtëzakonshme qeveria mori vendim për anulimin e të gjitha aktiviteteve kulturore në hapësirat e mbyllura në vend. Kryeministri Bojko Borisov bëri  thirrje që të mos ketë panik dhe qytetarët të mos furnizohen me ushqime, duke i siguruar se rrjetet e mëdha të dyqaneve disponojnë rezerva për të paktën 30 ditë përpara. Janë marrë dhe po merren të gjitha masat e domosdoshme për përballimin e situatës së krijuar për shkak të koronavirusit,  tha gjithashtu Kryeministri. Me vendim të qeverisë për shkak të koronavirusit është ndaluar gjithashtu eksporti i maskave dhe i pajisjeve të tjera mbrojtëse, ndërsa Ministria bullgare e Punëve të Brendshme dhe Agjencia Shtetërore “Siguri Kombëtare” kanë marrë vendim për të punuar për parandalimin e spekulimit me pajisje të tilla. Ministria e Shëndetësisë dha urdhër për një regjim special të punës në spitalet e Plevenit dhe të Gabrovos, ku janë regjistruar 4 rastet e para të koronavirusit në Bullgari.