Nikolla Vapcarov lindi më 7 dhjetor të vitit 1909 në qytetin Bansko në familjen e Jonko Vapcarovit, njeri prej komitëve të krahinës së Pirinit dhe aktivist i VMRO-së. Nëna Elena Vapcarova ishte një grua e arsimuar dhe inteligjente, e diplomuar në Kolegjin Amerikan në qytetin Samokov.

Ndër mysafirët në shtëpinë në Bansko që kur ishte i vogël ishin intelektualë të tillë të njohur si poetët Pejo Javorov dhe Elisaveta Bagrjana, piktorët Konstantin Shtërkellov, Ivan Penkov etj. Mbretërit Ferdinand dhe Boris III gjithashtu ishin ndër miqtë e familjes Vapcarov.

Nikolla Vapcarovi është një nga figurat më të diskutueshme në leximin bullgaro-maqedonas të historisë. Për shkak të pjesëmarrjes së tij në Rrethin Letrar Maqedonas të krijuar në Sofje me urdhër të Kominternit, studiuesit në Shkup e tregojnë atë si një poet antifashist maqedonas. Por Vapcarovi është pjesë e letërsisë bullgare dhe ndryshe nga anëtarët e tjerë të Rrethit ai kurrë nuk shkroi mbi normën letrare "maqedonase" të krijuar dhe të imponuar në atë kohë.