Korridore të gjelbra për vaksinim edhe në ditën e dytë të Pashkëve

Edhe ditën e dytë festive të Pashkëve vazhdojnë të punojnë qendrat për vaksinimin kundër Covid-19 në 19 qytete të ndryshme të vendit, duke përfshirë edhe kryeqytetin. Plani i autoriteteve shëndetësore është imunizimet e lira të vazhdojnë minimum deri më 9 maj.

Pas 10 majit pritet që prapë të fillojë regjistrimi për imunizim në portalin elektronik. Kësaj here njerëzit do të kenë të drejtën të imunizohen me vaksinën e preferuar prej tyre.

348 janë të infektuarit rishtas me koronavirus

Gjatë 24 orëve të fundit u zbuluan 348 raste të reja të koronavirusit nga 3194 testet e kryera, sipas të dhënave nga Portali i Unifikuar i Informacionit. Shumica e të infektuarve janë në Varna - 56, në Sofje - 51 dhe në Burgas - 27.

553 njerëz u shëruan, 48 – vdiqën.

Të shtruarit në spital janë 6754, prej tyre 662 në njësitë e kujdesit intensiv.

Dje u dhanë 3405 doza vaksinash dhe me to numri i përgjithshëm u bë 824 623. Imunizimi me dozën e dytë tejkaloi 216 mijë persona.

Na pret një sezon i vështirë turistik

Midis 60 dhe 70 për qind të hoteleve të mëdhenj në det nuk do të hapen gjatë sezonit turistik veror, mendon Georgi Nikollçev, kryetar i Asociacionit të Pronarëve në Turizëm. Arsyeja është “pasiguria absolute për mysafirët që do të vijnë nga jashtë”. Sipas hotelierit, qeveria duhet të marrë masa të shpejta për të negociuar klientët tanë kryesorë turistikë – Britania e Madhe, Gjermania, Rusia, Polonia. “Akoma nuk ka një rregullore të unifikuar të Bashkimit Evropian për turistët që udhëtojnë brenda komunitetit. Rregullore të tilla priten deri në fund të qershorit, kur megjithatë do të jetë tepër vonë për rezervime”,  tha Georgi Nikollçev.

Gjithçka më të rëndësishme për COVID-19 në shqip mund të lexoni në seksionin tonë të posaçëm për koronavirusin.

Mund të gjeni informacion aktual për koronavirusin dhe masat në Bullgari në akoma 9 gjuhë në ueb sajtin e Radio Bullgarisë.

Përpiloi: Diana Cankova

Përgatiti në shqip: Svetllana Dimitrova