Nga 1 gushti rivendosen fluturimet direkte mes Shqipërisë dhe Bullgarisë, njoftoi Ambasada e Republikës së Shqipërisë në Sofje.

Kompania GullivAir do t’i kryejë udhëtimet direkte javore Sofje-Tiranë-Sofje në periudhën 6 gusht – 28 shtator. Qëllimi i kësaj iniciative është studimi i tregut për rivendosjen e linjës ajrore të rregullt mes Shqipërisë dhe Bullgarisë dhe kryerjen e fluturimeve të tjera ndërkombëtare.

Në datën 1 gusht do të jetë fluturimi i parë inagurues dhe në bordin e avionit do të jenë udhëtarë, agjentë dhe tur operatorë të ftuar nga kompania. Ky udhëtim do të jetë falas. Ndërsa, më 6 gusht do të jetë fluturimi i parë me pagesë për qytetarët. Gjatë kësaj jave pritet të lancohet sistemi për rezervimin dhe blerjen e biletave, i cili aktualisht është në testim.

Në periudhën 6 gusht-15 shtator, kompania do të operojë 1 herë në javë, ditën e premte, ndërsa në periudhën 15-28 shtator do të operojë 2 herë në javë, të premten dhe të dielën. Detaje të mëtejshme lidhur me fluturimet, oraret dhe datat do të publikohen në faqen zyrtare të Aeroportit të Sofjes dhe kompanisë.