Ministri i Mbrojtjes i SHBA-së Lloyd Austin do të vizitojë Bullgarinë këtë javë, njoftoi Pentagoni. Austin mbërrin në Evropë për të mbështetur aleatët e NATO-së në sfondin e luftës pranë kufijve lindorë të paktit, raporton BTA.

Zëdhënësi i Pentagonit John Kirby tha se Austin do të jetë në Bruksel më 16 mars për takimin e ministrave të mbrojtjes të Aleancës. Më pas ai do të vizitojë Sllovakinë dhe në momentin e fundit programit iu shtua ardhja në Sofje. “Ministri shtoi një ndalesë të tretë në planet e tij - Bullgarinë. Udhëtimi zgjatet me një ditë në mënyrë që të ketë mundësinë të takohet me liderët civilë dhe ushtarakë të Bullgarisë. Kjo është një ndalesë kyçe nga pikëpamja e krahut lindor të Aleancës”, tha Kirby.