Më 8 dhjetor, studentët bullgarë shënojnë festën e tyre për të 119-tën herë radhazi. Ideja erdhi nga Ministri i Arsimit Prof. Ivan Shishmanov, i cili në vitin 1897 propozoi që Shkolla e parë e Lartë në Bullgari të ketë “një festë më të veçantë, të vetin”, kujton BTA. Vendimi u mor më 2 nëntor 1902, kur në mbledhjen e tij Këshilli Akademik i Shkollës së Lartë përcaktoi ditën e edukatorit Shenjtor Kliment Ohridski - 25 nëntorin (8 dhjetor sipas stilit të ri), për festën e tij. Një vit më pas, studentët e përkujtuan atë në sallën e Vatrës së Kulturës “Sllavjanska beseda” në Sofje, dhe në vitin 1905, në Rregulloren e Shkollës së Lartë u shkrua për herë të parë teksti se 25 nëntori është festa e mbrojtësit të saj.

• Shën Klementi – letrari, i cili ia kushtoi jetën përhapjes së krishterimit dhe arsimimit të bullgarëve

Për shkak të vendosjes zyrtare të Kalendarit Gregorian në Bullgari, nga viti 1916 festa e universitetit u zhvendos 13 ditë përpara dhe filloi të shënohej më 8 dhjetor.

Pas vitit 1944 festa e studentëve u zhvendos më 17 nëntor, kur është Dita Ndërkombëtare e Solidaritetit Studentor, por në vitin 1962 festa e universitetit u rikthye sërish më 8 dhjetor.

Disa vite më vonë, në vitin 1968, Kisha Ortodokse Bullgare caktoi përsëri 25 Nëntorin si ditë e Shën Kliment Ohridski, dhe Këshilli Akademik i Universitetit të Sofjes vendosi gjithashtu që të kthejë datën e festës së patronit më 25 nëntor, ditën e Shën Klimenti, kryepeshkopi i Ohrit, për ta ndarë nga data 8 dhjetor. Kështu, 8 dhjetori mbetet një datë laike dhe një festë e dashur për studentët bullgarë.

Që nga viti 1994, kjo ditë u shpall zyrtarisht nga Këshilli i Rektorëve si ditë jashtëshkollore dhe festë për të gjithë studentët bullgarë.

Sipas të dhënave të edicionit të fundit të Sistemit të Vlerësimit të Shkollave të Larta, numri i studentëve në vendin tonë është mbi 200 mijë. Mbi 28 mijë prej tyre ndjekin ekonominë.