Nëse rruga ju çon në Kishinau, kryeqytetin e Moldavisë, duhet të ndaloni edhe pranë kishës "Shën Gjergji" atje. Ajo do të lërë gjurmë të thella në kujtimet tuaja me sharmin e saj dhe historinë prekëse të krijimit të saj. Ne vendosëm t'i hedhim një sy kësaj kishe me ju sot, në ditën e festës së tij - Dita e Shën Gjergj Trofeprurësit – Martiri i madh. Është e vetmja kishë në Moldavi ku shërbesat kryhen në gjuhën kishtare sllave. Por kjo nuk është e vetmja gjë që e bën atë shumë të veçantë. Kështu tha Georgi Barbarov, kryetar i komunës bullgare në Republikën e Moldavisë për Miglena Ivanovën dhe Radio Bulgarinë, në lidhje me ndërtimin e kishës "Shën Gjergji" në kryeqytetin moldav:

“Në vitin 1814 u mor vendimi për ndërtimin e kësaj kishe. Prift Gjergji nga Kishinau shkoi të mblidhte para për realizimin e idesë nga bullgarët në Bullgari /që në atë kohë ishte nën pushtimin osman/. Mirëpo, ai kapet nga turqit, të cilët ia mbushin gojën me kallaj. d.m.th. ai vdes gjatë kohës që mbledh para për kishën. Më vonë kisha merr emrin e tij.”

Georgi Barbarov thotë se këtë histori e ka mësuar nga udhëheqësi i kishës “Shën Gjergji”, At Nikollaj Fllorinski. Iniciatori për ndërtimin e kishës, prifti Gjergji, është përfaqësues i komunitetit vendas bullgar, që ka më shumë se 200 vite në ato troje. Megjithatë, fondet për kishën u mblodhën nga komuniteti bullgar në Besarabi dhe nga bullgarët në trevat bullgare dhe kështu u ndërtua në vitin 1819. Më 10 nëntor 1940, Moldavia u trondit nga një tërmet i fuqishëm, i cili solli shumë viktima dhe dëme të mëdha, duke përfshirë edhe kishën "Shën Gjergji" - kupola qendrore e së cilës është plotësisht e shkatërruar, kambanorja dhe muret janë gjithashtu të prekura. Mirëpo, me thirrjen e udhëheqësit të kishës, donacionet u mblodhën mjaft shpejt dhe me mbështetjen financiare të bashkisë së Kishinaut, kisha "Shën Gjergji" u restaurua.

Georgi Barbarov saktëson se kjo nuk është e vetmja kishë ku mblidhen bullgarët në Moldavi. Në qytetin Taraklia ata kanë edhe tempullin e tyre, që mban emrin e Shën Gjergj Trofeprurësit. Në Kishinau gjendet një vend i quajtur “Shipka” ku ndodhet edhe një kishë e vogël.

"Nga atje u nisën për të çliruar Bullgarinë në prill 1877 - bullgarë nga Besarabia, rusë dhe vullnetarë moldavë nga Moldavia, për në Bullgari."

Për mënyrën se si bullgarët në Moldavi e festojnë 6 majin – Ditën e Shën Gjergj Trofeprurësit, Georgi Barbarov tregon:

“Ne në këtë festë hamë mish qengji të pjekur. Siç është zakon, në ditën e Shën Gjergjit, çdo familje në të cilën ka një person me emrin Georgi (Gjergji), e feston këtë festë duke përgatitur një qengj në furrë, të mbushur me bulgur, oriz ose së fundmi - me hikërror, bëhet shumë i shijshëm. Duhet të themi se kjo nuk është një festë zyrtare si në Bullgari, është thjesht një festë për njerëzit me emrin Georgi”.

Përgatiti në shqip: Kostandina Bello