Komisioneri evropian për buxhetin Johanes Han do të takohet të enjten në Sofje me kryeministrin Nikollaj Denkov dhe zëvendëskryeministren dhe ministre të  punëve të jashtme Maria Gabriel. Vizita është pjesë e turneut të tij evropian përpara njoftimit të korigjimeve të buxhetit afatgjatë të BE-së. Detajet pritet të zbardhen më 20 qershor, shkruan faqja “Dnevnik”. Bullgaria është ndalesa e tretë e komisionerit pas Letonisë dhe Austrisë.

Komisioni Evropian do të paraqesë javën e ardhshme pikëpamjen e tij për rishikimin e buxhetit afatgjatë të BE-së deri në vitin 2027. Më 7 qershor, Komisioni pranoi se shpenzimet e Bashkimit janë në kufirin e mundësive buxhetore për shkak të inflacionit të lartë, rritjes së kostos së shërbimit të borxhit të supozuar për financimin e programeve të rimëkëmbjes dhe zhvillimit pas Covid-19 dhe për shkak të fondeve emergjente në mbështetje të Ukrainës.