Minatorët dhe punëtorët e energjetikës që protestuan prej 14 ditësh liruan të gjitha rrugët në territorin e rajonit të qytetit Stara Zagora dhe qarkullimi u rivendos, njoftoi Agjencia e Infrastrukturës Rrugore. Autostrada “Trakia”, Qafa e Republikës dhe rruga Sliven-Kazanllëk në rajonin e Gurkovo janë tani të hapura.

“Ne nuk po tërhiqemi, thjesht po heqim bllokimet dhe po vazhdojmë me veprimet e mëvonshme, me të cilat mendojmë se mund të realizohen kërkesat tona”, tha shefi i Konfederatës së Punës Podkrepa në Termocentralin “Marica-Lindje 2” Biser Binev.

Protestuesit kërkojnë që të tërhiqen dhe të rishikohen planet territoriale për rajonet e qymyrit të paraqitura në Komisionin Evropian.