Në tre-katër vitet e fundit, 89.1 për qind e bullgarëve i kushtojnë vëmendje të ushqyerit të shëndetshëm dhe 60.6 për qind e kanë ndryshuar dietën e tyre. Megjithatë, vetëm 10.4 për qind hanë mëngjes rregullisht, dhe për 45.4 për qind darka është vakti kryesor. Këtë e tregon një sondazh i zakoneve të të ngrënit të bullgarëve, i porositur nga një zinxhir i madh shitjesh me pakicë, në partneritet me Universitetin e Mjekësisë në Varna dhe Shoqatën "Prindër", i kryer në janar, mes 800 personave. Burrat dhe gratë e pyetura janë të moshës nga 16 deri në 70 vjeç nga vendbanime të ndryshme. Sondazhi tregon se 43.1 për qind e bullgarëve preferojnë të përgatisin ushqimin e tyre.

Gati 40 për qind e të anketuarve besojnë se ushqimi ndikon drejtpërdrejt në shëndetin, por për 20 për qind ushqimi i shëndetshëm është i shtrenjtë. Sipas 55.6 për qind të bashkatdhetarëve tanë, të ushqyerit e shëndetshëm do të thotë të hani një shumëllojshmëri ushqimesh, dhe për 27.4 për qind - të hani më shumë fruta dhe perime. Për 23.9 për qind, është gjithashtu e nevojshme një dietë e ekuilibruar me ushqime vitaminoze dhe për 16.4 për qind, janë gjithashtu të rëndësishme sasitë e arsyeshme.

Në të njëjtën kohë, Shoqata “Prindër” raporton se 68.4 për qind e prindërve i lejojnë fëmijët të zgjedhin çfarë të hanë. Vetëm 31.6 për qind monitorojnë saktësisht se çfarë hanë dhe kufizojnë konsumin e ëmbëlsirave, patateve të skuqura, makaronave dhe pijeve të gazuara.