Nuk ka ndryshime të rëndësishme në qëndrimet e njerëzve në fund të fushatës zgjedhore në krahasim me fillimin. Këto janë rezultatet e një sondazhi sociologjik të “Trend”, të porositur nga “24 Çasa”, në periudhën 16-22 tetor 2024 përmes një interviste të drejtpërdrejtë gjysmë të standardizuar “ballë për ballë” me një tabletë mes 1002 të rriturve.

Sipas të dhënave të “Trend”, në Asamblenë e 51-të Kombëtare do të marrin pjesë shtatë formacione me përfaqësim të sigurt parlamentar, dy të tjera kanë mundësi për të kaluar barrierën.

Në renditjen e agjencisë GERB-SDS është sërish në vendin e parë me mbështetjen e 24,9 për qind të votuesve. Në vend të dytë renditen “Vëzrazhdane” - me 15,2 për qind, e ndjekur nga "Po e vazhdojmë ndryshimin-Bullgaria Demokratike" (PP-DB) - me 14,8. Pas tyre janë “Aleanca për të Drejta dhe Liri” me 7,8 për qind, “DPS-Fillimi i Ri” me 7 për qind, “Ka një popull të tillë” (ITN) me 6,6 për qind dhe Partia Socialiste Bullgare (BSP) me 6,5 për qind. Partia MEÇ është në kufi me 4%, “Veliçie” mbetet nën vijën, me 3,6%, si dhe “Bullgaria Blu” me 1,7% të votuesve. Me “Unë nuk mbështes askënd” do të votonin 4.3 për qind prej zgjedhësve .

“Trend” vëren se mund të ketë disa ndryshime në renditje, sepse diferencat mes disa formacioneve janë nën një përqind. Nga studimi i porositur nga “24 Çasa”, del qartë gjithashtu se fushata zgjedhore nuk ka arritur të motivojë më shumë votues për të ushtruar të drejtën e tyre të votës. Pritet që pjesëmarrja të jetë ndërmjet 2 milionë dhe 2 milionë e 200 mijë njerëz.