Ministri i Mbrojtjes i Greqisë, Nikos Dendias, prezantoi para partive në parlament planin e ndryshimeve në ushtri. Reformat do të përfshijnë të tre llojet e trupave. Deri në vitin 2030 Do të mbyllen 33 njësi që kanë humbur vlerën e tyre operative. Në disa nga njësitë e planifikuara për mbyllje, personeli nuk mbulon as 20% të vendeve dhe shumë prej tyre shihen vetëm si një mjet për të mbështetur ekonominë lokale. Një nga njësitë kufitare aktualisht nuk ka gjë tjetër veç furrës së bukës, shkruan ekathimerini.com. Qëllimi është që stafi i njësisë të mos jetë nën 70%. Për herë të parë, mbrojtja ajrore me tre nivele është planifikuar të mbulojë të gjithë hapësirën ajrore të Greqisë kontinentale dhe ishujve.

Parlamenti rumun ka miratuar blerjen e 32 avionëve luftarakë amerikanë të gjeneratës së pestë F-35, raporton “Digi24”. Marrëveshja përfshin gjithashtu furnizimin me motorë, municione, mbështetje fillestare logjistike, akses të vazhdueshëm në zinxhirin global të mirëmbajtjes së F-35, pajisje dhe shërbime për trajnimin e ekuipazhit, personelit ndihmës, personelit inxhinierik dhe teknik, asistencë të specializuar dhe zbatimin e projekteve të bashkëpunimit industrial, nëpërmjet transferimit të teknologjisë.

Ndërkohë, një kompani private rumune ka blerë një aeroplan që prodhon shi nga një kompani amerikane, transmeton ziare.com. Faqja sqaron se teknologjia e "mbjelles së reve" deri më tani është përdorur në vend vetëm nëpërmjet avionëve me qera.

Në rrugët e kryeqytetit serb, Beogradit, janë shfaqur postera me presidentin e sapozgjedhur të SHBA-së, Donald Trump, me mbishkrimin “Make Serbia Great Again”, transmeton edicioni kroat i televizionit n1info.rs. Posterat u vendosën nga lëvizja konservatore serbe "Nashi", duke imituar sloganin e Trumpit "Make America Great Again". Posterat tregojnë gjithashtu një hartë të "Serbisë së Madhe" duke përfshirë Maqedoninë e Veriut. Me këtë veprim ne tërheqim vëmendjen për nevojën që Serbia të rifitojë pozitën e merituar në Ballkan dhe në botë dhe duam të korrigjojmë padrejtësitë historike që i janë shkaktuar popullit tonë me dekada, thekson lëvizja serbe, transmeton BTA. Në sheshin në qendër të Prishtinës janë shfaqur edhe postera me presidentin e sapozgjedhur amerikan Donald Trump dhe thirrjen “Make Kosova Great Again”, transmeton kosovapress.com.

Shqipëria mbetet e përkushtuar për të mbrojtur të drejtat e shqiptarëve në Serbi, tha ministri i Jashtëm shqiptar Igli Hasani, cituar nga ATA. Ai priti në Tiranë deputetin e Kuvendit të Serbisë, Shaip Kamberi, i cili është kryetar i Partisë për Veprim Demokratik në Serbi. Presidenti shqiptar Bajram Begaj dhe kryetarja e Kuvendit Elisa Spiropali shprehën gjithashtu mbështetjen e tyre institucionale për shqiptarët nga Lugina e Preshevës në Serbinë jugore. Begaj shtoi se Konsullata e Përgjithshme e Shqipërisë në Bujanoc është në prag të hapjes dhe se Tirana thekson në të gjitha takimet me përfaqësues të komunitetit ndërkombëtar “të ndalet fshirja e adresave të shqiptarëve në Luginën e Preshevës dhe të njihen diplomat e të diplomuarve në Shqipëri dhe Kosovë, e drejtë kjo e garantuar edhe nga procesi i Berlinit”.

Linja detare mes Budvës (Mali i Zi) dhe Dubrovnikut (Kroaci) ishte shumë e suksesshme gjatë sezonit të kaluar veror dhe përmbushi plotësisht pritjet, tha ministri malazez i Punëve Detare Filip Raduloviç, raporton agjencia MINA posaçërisht për BTA. Ai bëri të ditur se linja do të rihapet vitin e ardhshëm, duke funksionuar që në fillim të sezonit veror. Raduloviç është i bindur se hapja e linjave të reja të trageteve që lidhin qytetet bregdetare malazeze me destinacionet kryesore turistike në vendet fqinje është thelbësore si për turizmin ashtu edhe për transportin ditor, sepse përmirëson lidhjen, përshpejton transportin dhe redukton bllokimet e trafikut.

Përpiloi: Ivo Ivanov

Foto: dendias.gr, romania.europalibera.org, BGNES, X/ Igli Hasani, MINA

Përgatiti në shqip dhe publikoi: Kostandina Bello