Përfshirja e bullgarëve në kushtetutën e Maqedonisë së Veriut duhet të bëhet me "efekt të vonuar" - pasi vendi të bëhet anëtar i Bashkimit Evropian. Presidentja e Maqedonisë së Veriut Gordana Siljanovska ia bëri këtë propozim kreut të shtetit Rumen Radev në Baku, pohon ajo në një intervistë për Radion dhe Televizionin Shtetëror Maqedonas. Sipas saj, presidenti bullgar nuk e ka komentuar synimin e shprehur.

Disa ditë pas bisedës, Rumen Radev deklaroi se Shkupi është i vetëdijshëm për qëndrimin bullgar dhe se ndryshimet kushtetuese duhet të hyjnë në fuqi para fillimit të negociatave për anëtarësim të vendit në BE. “Znj. Siljanovska, si juriste e mirë, është shumë e vetëdijshme se duhet të përmbushen zotimet e marra në traktatet dhe marrëveshjet ndërkombëtare”, theksoi ai.

Në rrjetin social X, presidenti bullgar ka uruar ish-ministren ushtarake të RSM-së, Radmila Shekerinska për emërimin e saj në postin e zv. Sekretares së Përgjithshme të NATO-s dhe ka shprehur pritjen që me punën e saj të kontribuojë në forcimin e mbrojtjes kolektive dhe sigurisë së aleancës.