Heqja e kufijve tokësorë për Bullgarinë dhe Rumaninë në Shengen do të bëhet realitet brenda pak javësh, sipas Komisioneres Evropiane për Punët e Brendshme Ilva Johansson. Në një intervistë për Radion Evropa e Lirë - Rumani, ajo tha se është optimiste për vendimin e Vjenës. Pyetjes, se cilat janë argumentet për bllokimin e aksesit të të dyja vendeve në anëtarësimin e plotë, Komisionerja Evropiane iu përgjigj: “Nuk shoh asnjë pengesë, gjithçka është përmbushur. Shpresoj që kjo të ndodhë përpara se të përfundoj mandatin tim pas disa javësh”.

Sipas Ilva Johansson, Bullgaria dhe Rumania janë më të përgatitura për t'u marrë me zonën Shengen dhe kufijtë tokësorë sesa disa vende anëtare.

"Sigurisht, këtë herë ka sinjale dhe shpresë se të gjitha pengesat për pranimin e Bullgarisë dhe Rumanisë në zonën Shengen dhe në rrugë tokësore do të hiqen", tha eurodeputeti Andrej Kovaçev në Strasburg. Ai shtoi se me interes të madh pritet takimi i sotëm i ministrave të brendshëm të Bullgarisë, Rumanisë dhe Austrisë në Budapest, në të cilin do të diskutohen kushtet e Vjenës për pranimin e plotë të dy vendeve në Shengen.

Në prag të takimit, ministri i brendshëm austriak Gerhard Karner deklaroi në një intervistë për Agjencinë Austriake të Lajmeve APA se Sofja dhe Bukureshti kanë bërë përparim të madh në ruajtjen e kufijve të jashtëm dhe luftimin e trafikimit të paligjshëm të emigrantëve. “Përpjekjet po japin rezultat, ne duam të shkojmë në këtë mënyrë dhe të miratojmë një paketë të re”, shtoi ai.

Kushtet e reja do të ndikojnë në rritjen e fondeve për mbrojtjen e kufijve të jashtëm dhe më shumë kontrolle kufitare mes dy vendeve.