Nga kuzhinat e zhurmshme të restoranteve londineze me yje të Michelin-it deri te një fshat i fshehur në pyjet e maleve Rodope, zhvillimi profesional i Petko Sharankovit është plot kthesa dhe surpriza. Pasi jetoi për shumë vite në Londër, ku zotëroi specifikat e kuzhinës evropiane, ai u kthye në Bullgari. Në vendin tonë Petko u vendos me familjen në fshatin Kosovo për të vendosur standarde të reja në të ashtuquajturën “haute cuisine”.

"Kur shkova në Britaninë e Madhe në vitet 2005-2006, doja të mësoja nga më të mirët. Atëherë, Britania e Madhe ishte në "majë të shtizës" për sa i përket gatimit. Kam kaluar mjaftueshëm kohë në kuzhina të tilla, mësova shumë dhe pas 10-15 vitesh, me 2 fëmijë, me familje, arrita në një pikë në karrierën time kur doja të bëja diçka timen, sepse kur punoni në vende të tilla, të tjerët diktojnë. Ju vetëm mund të jepni këshilla, por jeni një dhëmbëz në një makinë të madhe”, thotë Petko Sharankov në një intervistë për Radio Bullgarinë.

Që nga korriku i vitit 2024, shef Sharankov e ka restorantin e tij jo më pak të denjë për yjet e Michelin. Ai pohon se është gjendur krejt rastësisht në fshatin bullgar Kosovo, duke mësuar nga një mik i tij se në fshat kanë nevojë për një master kuzhinier për një restorant:

“Deri atëherë nuk e dija fshatin Kosovo, e dija se ku ishte, por e dija se ishte më larg dhe kur u ngjita për herë të parë atje, pashë që vendi ishte magjik. Unë kam një lidhje të thellë me malet e Rodopeve dhe kur qëndrova në çardakun, ku është restoranti dhe pash drejt maleve dhe kodrave i thashë vetes: "OK, ky është një vend i mirë!" Madje nuk kishte rëndësi nëse restoranti do të ishte i suksesshëm apo jo.

Për Chef Sharankov, gatimi nuk është vetëm një përgatitje e ushqimit, por është një art. Kjo është një mënyrë për t'u lidhur me njerëzit, për t'u treguar histori nga e kaluara dhe për t'u ofruar atyre një përvojë unike jo vetëm për qiellzën, por edhe për shpirtin.

"Kam pasur privilegjin të rritem me gjyshet. Dhe ajo që dua të arrij në ushqim janë ato shijet e vjetra me të cilat jam rritur. Gjërat që kur zgjohesha çdo mëngjes i haja, që i haja për darkë në shtëpinë e tyre dhe që i kishin gatuar për mua me dashuri dhe dëshirë. Dhe këto shije i dua shumë. Për mua kjo është kuzhina bullgare. Unë përdor produkte vendase dhe mbështetem në metodat e vjetra të gatimit të transmetuara brez pas brezi në zonë. Gjithçka që hamë vjen nga fermat aty pranë. Mishi ynë vjen nga fermat e vogla blegtorale, si dhe kosi ynë, jo më shumë se 30 km nga Kosovo. Dhe kur i merrni këto produkte të pastra dhe i gërshetoni ato me përvojën time teknologjike lidhur me të ashtuquajturat " high-end cuisine”, rezultati përfundimtar është një përzierje e shijeve klasike, por me teknika moderne," shpjegon Chef Sharankov.

Interesi për mishërimet e tij kulinare nuk vonon, aq më tepër që restoranti ndodhet në një nga fshatrat më piktoresk të malit Rodope. Gjithnjë e më shumë mysafirë - bullgarë dhe të huaj - po e vizitojnë Kosovon jo vetëm për shkak të shtëpive të bukura prej guri të vendosura në shpatet e malit, por edhe për shkak të kuzhinës së veçantë të mjeshtërit-kuzhinier. Këta njerëz nuk vijnë vetëm për të konsumuar ushqime dhe pije, por duan të komunikojnë me mua, ata janë të interesuar se me çfarë teknologjie është përgatitur, nga vijnë produktet”, thotë Chef Sharankov. Falë konceptit të tij për kuzhinën moderne të Rodopeve, fshati Kosovo është në rrugën e tij për t'u bërë një tjetër destinacion i turizmit gourmet në vendin tonë.

Lexoni më shumë nga koleksioni i Radio Bullgarisë:

• Zellnik, skrob, picë me drithëra të plota dhe bozë - fshatrat e Kjustendilit si destinacione tërheqëse gastronomike

• Cila është shija e Bullgarisë - kuzhina si pjesë e kartës sonë turistike

• 5 pjata të njohura bullgare që mund t’ju duken ... të çuditshme

• Shijoni Bullgarinë për ta njohur dhe dashuruar!

• Kur shijet gastronomike udhëtojnë nëpër kohë - turet e kuzhinës po bëhen gjithnjë e më të njohura tek të rinjtë në vendin tonë

Foto: Petko Sharankov, Gergana Babaxhanova
Përgatiti në shqip dhe publikoi: Vesella Mançeva