Bullgaria duhet të marrë financim të synuar për mbrojtjen - këtë e ka kërkuar eurodeputeti bullgar i Partisë Popullore Evropiane (EPP), Andrej Novakov nga Komisioneri i ri i Komisionit Evropian (KE) për Mbrojtjen. Diskutimi strategjik i burimeve të mbrojtjes dhe zhvillimi i një strategjie të mbrojtjes në përgatitjen e të ashtuquajturit "Libër i Bardhë", i cili duhet të prezantohet deri më 19 shkurt, ishte një temë kryesore në seancën plenare të Parlamentit Evropian në javën e dytë të shkurtit.

Iniciativa për një takim me Komisionerin e Mbrojtjes, Andrius Kubilius, erdhi nga i vetmi anëtar bullgar i plotë i Komisionit për Sigurinë dhe Mbrojtjen në Parlamentin Evropian, Andrej Novakov, i cili e ftoi Kubilius të vizitojë Bullgarinë. Andrius Kubilius është Komisioneri i parë Evropian për Mbrojtjen – një detyrë që u fut në përbërjen e re të KE-së.

"Ajo që po ndodh në të gjithë botën në mënyrë të pashmangshme prek edhe neve dhe na prek menjëherë, pavarësisht nëse po flasim për luftë apo taksa doganore," tha Novakov për Radion Kombëtare Bullgare gjatë seancës parlamentare në Strasburg, "Bullgaria është një faktor i pashmangshëm në rajon dhe si e tillë, së bashku me Rumaninë, duhet të marrë financime të synuara, sepse duke ruajtur kufijtë tanë, ne në fakt po mbrojmë gjumin e qetë të të gjithë Evropës. Le të fillojmë të koordinojmë ndërtimin e potencialit të mbrojtjes dhe në fund të fillojmë të porositim pajisje përmes prokurimeve të përbashkëta publike, në mënyrë që çmimi të bjerë dhe të përfitojmë mjaftueshëm”.

Sipas Andrej Novakov, tarifat që SHBA planifikon të vendosë mbi çelikun dhe aluminin evropian nga 12 marsi nuk do ta shpërqendrojnë BE-në nga përpjekjet që synojnë të mbështesin Ukrainën nëse Evropa befas e gjen veten të përfshirë në një luftë të re tregtare.

"Unë nuk mendoj se BE-ja do të shpërqendrohet nga ajo që po ndodh në Ukrainë, BE-ja ka shumë të ngjarë të shpërqendrohet nga Marrëveshja e Gjelbër. Dua t'ju kujtoj se ka pasur një tension të tillë mes SHBA-së dhe Evropës në të kaluarën. Pastaj Jean-Claude Juncker ndërhyri dhe kjo luftë tregtare u pezullua. Unë kam shpresë se kjo do të ndodhë."

Në lidhje me mbështetjen e Bullgarisë për Ukrainën, Novakov theksoi:

"Për sa i përket mbështetjes për Ukrainën, këtu nuk ka asnjë intrigë. Janë të pakta vendet që e kanë ndihmuar kaq shumë Ukrainën, si me armë dhe pajisje, ashtu edhe me mbështetje për personelin e ushtrisë ukrainase."

Eurodeputeti bullgar e cilësoi si një shenjë pozitive formimin e një kabineti të rregullt në Bullgari, pavarësisht kompromiseve të pashmangshme:

“Përfitimi i parë i kësaj qeverie ishte në 24 orët e para, kur këtu pushuan së qeshuri me ne dhe të trembin njerëzit duke thënë, “Shiko, që të mos ndodhë si në Bullgari”, madje i dhanë emrin “rrotullama bullgare”, tha eurodeputeti bullgar Andrej Novakov për gazetares së Radios Kombëtare Bullgare në Strasburg, Irina Nedeva.

Intervista: Irina Nedeva

Redaktoi: Rosica Petkova

Foto: Facebook /Andrej Novakov, BTA

Përgatiti në shqip dhe publikoi: Vesella Mançeva