Bullgaria ka potencial unik turistik dhe ne jemi këtu për ta prezantuar atë në mënyrën më të mirë. Këtë e deklaroi ministri i turizmit Mirosllav Borshosh lidhur me pjesëmarrjen e vendit në ekspozitën më të madhe ndërkombëtare të turizmit në botë, Internationale Tourismus-Börse (ITB) në Berlin. “Ne krijojmë mundësi për kontakte biznesi, prezantojmë trashëgiminë tonë të pasur kulturore dhe natyrore dhe afirmojmë vendin si një destinacion i preferuar në hartën turistike botërore”, tha Borshosh. Në ekspozitë, Bullgaria përfaqësohet me një stendë moderne dhe tërheqëse prej afro 600 metrash katrorë, ku marrin pjesë 49 përfaqësues të bashkive, të biznesit turistik, operatorëve kryesorë turistikë, hoteleve dhe organizatave turistike.