"Emërimet po e zhvendosin procesin normal legjislativ. Shpërndarja e kuotave partiake për këto organe është fakt, mandatet tashmë janë caktuar dhe janë shpërndarë", tha Teodor Sllavev nga Instituti Bullgar për Iniciativa Ligjore në një intervistë për programin "Horizont" të BNR-së.

Megjithatë, bullgarët presin që përzgjedhja që do të bëhet gjatë zgjedhjes së organeve nga Kuvendi Popullor të jetë negative. Këtë e tregon një studim i kryer në periudhën 17-25 mars nga Global Metrics në emër të Institutit Bullgar për Iniciativa Ligjore:

"82% besojnë se do të zgjidhen individë të afërt me forcat politike dhe 77% besojnë se do të emërohen njerëz që do t'u shërbejnë interesave të këtyre forcave politike. Kjo do të thotë se ata nuk do të jenë njerëz të pavarur. Përzgjedhja negative që prodhon parlamenti vjen pas përzgjedhjes negative që bëjnë partitë kur propozojnë kandidatët e tyre për pozitat e ndryshme – në Kuvendin Popullor dhe për autoritetet lokale. Prandaj na duhen njerëz që kanë karakteristikë kryesore besnikërinë”.

Është e rëndësishme që Bullgaria të ketë institucione dhe administratë publike të pavarura dhe profesionale. Dhe 90% e të anketuarve thonë se shoqëria duhet të marrë pjesë në një llojë forme në procedurën e përzgjedhjes së organeve përmes organizatave joqeveritare.

"Mënyra në të cilën ata kanë zgjedhur organet e deritanishme na çon të mendojmë se do të kërkojnë një person që nuk do të duhet të përballet me këtë shumicë dhe që do ta shohë pozitivisht këtë shumicë në rastin e zgjedhjeve të tjera të parakohshme", thotë Teodor Sllavev. Sipas tij, palët duhet të kuptojnë se pavarësia e organeve rregullatore është gjithashtu në interesin e tyre:

"Këto institucione do të siguronin lojë të ndershme. Nuk është mire nëse u shërbejnë pushtetarëve, pasi ata ndryshohen pas një periudhë kohore. Nëse në një moment u shërbejnë interesave të tyre, në një tjetër moment kjo gjë mund t’iu kthehet kundër, gjë që ne e kemi vërejtur dhe që është frika jonë se për momentin nuk do të shkojmë drejt zgjedhjes së Këshillit të Lartë Gjyqësor, inspektoratit dhe komisionit kundër korrupsionit. Edhe pse rregullat procedurale janë gati, ato nuk kanë kaluar përmes sallës plenare për shkak të dështimit të kuorumit, pikërisht sepse nuk mund të garantohet për momentin që shumica (prej 160 personash) do të sigurojë njerëz të tillë të bindur”.

Nuk mungojnë arsyet për të dyshuar në kriteret e përzgjedhjes së njerëzve për poste të rëndësishme dhe se sa ekspertiza dhe përvoja profesionale apo besnikëria partiake ndikojnë. Në këtë kontekst mund të përfshihet edhe njoftimi se Prokuroria Evropiane po nis një hetim administrativ për veprime të mundshme të paligjshme të prokurores evropiane bullgare Teodora Georgieva. Njoftimi erdhi pasi regjistrimet qarkulluan në internet këtë muaj, duke pretenduar se tregonin një bisedë të janarit 2020 midis Georgievës dhe të dyshuarit si lobist në pushtetin gjyqësor, ish-hetuesit Petjo Petrov, i njohur si Pepi Euroja. Sipas pretendimeve në video, Pepi Euroja mori pjesë në një plan për të eliminuar konkurrentët e Georgievës në garë. Zyra e Prokurorisë Evropiane nuk komentoi drejtpërdrejt përmbajtjen e regjistrimit, por theksoi se pavarësia e çdo prokurori në sistemin e saj është "thelbësore për misionin e institucionit". Në lidhje me këtë, përfaqësuesi i Institutit Bullgar për Iniciativa Ligjore, Teodor Sllavev, komentoi për Radion Kombëtare Bullgare:

"Sulmet kundër prokurorit tonë evropian erdhën pas një ngjarjeje që organizuam - një intervistë që ajo dha për "Capital", në të cilën ajo vuri në dukje probleme specifike - se si hetimet e Prokurorisë Evropiane në Bullgari po pengohen nga institucionet bullgare. Në të, ajo thotë drejtpërdrejt se sheh presion politik të fshihet pas kësaj. Është e jashtëzakonshme që ky organ (Prokuroria Evropiane) gjen mundësi për t'u kontrolluar dhe vetëpastruar - diçka që Gjykata jonë e Lartë nuk ka treguar se mund ta bëjë. I njëjti rregull duhet të zbatohet këtu, nëse kjo konfirmohet."

Sipas një interviste të Sillvia Velikovës, BNR-"Horizont"

Foto: BGNES, Julijana Kornazheva, bili-bg.org, БТА

Përgatiti në shqip dhe publikoi: Kostandina Bello