Programi i ditës
Madhësia e tekstit
Radioja Kombëtare Bullgare © 2025 Të gjitha të drejtat janë të rezervuara

Ngjarjet me adresë ballkanike

Vazhdojnë protestat në Turqi pas arrestimit të kryebashkiakut të Stambollit 

Protestat masive në Turqi nuk janë qetësuar që nga arrestimi i kryebashkiakut të Stambollit Ekrem Imamoglu më 19 mars. Gati 1900 persona u arrestuan për pjesëmarrje në demonstrata, 260 mbeten në paraburgim, raportoi BNT. Gjithashtu u arrestua edhe avokati i Imamoglu, Mehmet Pehlivan. Protestave i janë bashkuar edhe studentë dhe profesorë nga universitete të shumta në Stamboll, Izmir dhe Ankara, të cilët po bojkotojnë procesin akademik.

Edhe pse në paraburgim, Ekrem Imamoglu, i cili u hoq nga detyra me akuzën për korrupsion dhe terrorizëm, fitoi zgjedhjet e brendshme partiake të Partisë Republikane Popullore të opozitës, të mbajtura më 23 mars për të përcaktuar kandidatin e saj për zgjedhjet presidenciale, që do të mbahen në vitin 2028. Ai konsiderohet si konkurrenti më serioz i presidentit Recep Erdogan, që sipas opozitës është arsyeja e arrestimit të tij.

Ndërkohë gjykata turke ka liruar disa gazetarë që u arrestuan pas pasqyrimit të protestave. Mes tyre është edhe fotoreporteri i Agence France-Presse, Yasin Akgul. Ndryshe është fati i korrespondentit të BBC, Mark Lowen, të cilin Turqia vendosi ta dëbojë.

Azilkërkuesit e refuzuar në Mbretërinë e Bashkuar mund të dërgohen në Ballkan 

Aplikantët e refuzuar për azil në Mbretërinë e Bashkuar mund të dërgohen në qendrat e migrantëve në Ballkanin Perëndimor dhe në vende të tjera të treta. Kjo bëhet e ditur nga planet e autoriteteve britanike për të kufizuar kalimin e Kanalit Anglez me varka të vogla, raportoi korrespondenti i BNR-së në Londër Veselin Paunov. Qeveria po harton propozime për hapjen e një sërë “qendrash kthimi” jashtë vendit ku emigrantët do të dërgohen pasi t'u refuzohet azili dhe të kenë ezauruar të gjitha opsionet e apelimit. Negociatat formale nuk kanë filluar ende, por burime qeveritare thonë se ata planifikojnë të kontaktojnë vendet e Ballkanit Perëndimor, duke përfshirë Shqipërinë, Serbinë, Bosnjën dhe Hercegovinën dhe Maqedoninë e Veriut. Britania pritet të paguajë vendet për çdo azilkërkues të refuzuar të dërguar tek ata.

SHBA-ja do të rishikojë udhëtimin pa viza për rumunët 

Qeveria e SHBA-së ka vendosur të rishikojë përfshirjen e fundit të Rumanisë në programin e heqjes së vizave për të siguruar përputhshmëri të plotë me kërkesat strikte të sigurisë, njoftoi Radio Romania International. Pra, tani për tani, rumunët që dëshirojnë të udhëtojnë në SHBA për një periudhë të shkurtër kohe për biznes ose turizëm do të duhet të aplikojnë për një vizë B në një ambasadë ose konsullatë të SHBA-së.

Përfshirja e Rumanisë në programin e heqjes së vizave u njoftua pak para ardhjes së Presidentit Donald Trump në detyrë - më 10 janar të këtij viti, dhe ishte planifikuar që rumunët të mund të udhëtonin pa viza në SHBA për qëllime turizmi ose biznesi nga 31 marsi.

Në Qipro u japin nga 220 euro të rinjve për jetën kulturore

Qiproja do të ndajë një buxhet prej 500 mijë eurosh për programin e saj "Harta Kulturore Rinore" për vitin 2025, ka vendosur qeveria. Me këto para shteti do të subvencionojë pjesëmarrjen e të rinjve në ngjarje të ndryshme kulturore. Me kartat me vlerë 220 euro subvencione shtetërore, brenda një viti nga lëshimi i tyre, të rinjtë e moshës 18 deri në 21 vjeç do të mund të blejnë bileta për koncerte, shfaqje teatrore, shfaqje filmash, festivale arti, ekspozita, muze dhe vende arkeologjike, raportoi korrespondentja e BNR-së në Qipro, Branisllava Bobanac. Kjo mundësi mund të shfrytëzohet si nga të rinjtë bullgarë ashtu edhe nga të rinjtë nga vendet e tjera evropiane që jetojnë në ishull. Vitin e kaluar, karta të tilla jepeshin vetëm për 18-vjeçarët, por tashmë shtrirja e tyre është zgjeruar.

Përpiloi: Miglena Ivanova
Foto: BGNES, X /@GuvernulRo, bankofcyprus.com
Përgatiti në shqip dhe publikoi: Kostandina Bello

Më shumë nga rubrika

Natalija Kisellova

Kryetari i Parlamentit vizitoi Festën e Pashkëve në Bosilegrad

Situata politike duhet të na japë mundësinë të fillojmë të punojmë me bashkatdhetarët tanë jashtë vendit që kanë identitet dhe shtetësi bullgare, në mënyrë që të ruhet fryma dhe kujtesa bullgare. Këtë e deklaroi kryetarja e Kuvendit Popullor, Natalija..

botuar më 25-04-22 9.39.PD

Ngjarjet me adresë ballkanike

Çmimet e mallrave të Pashkëve po rriten Tryeza e Pashkëve në vendet e Ballkanit do të jetë më e shtrenjtë këtë vit, raporton BTA. Mishi i qengjit në Serbi është rreth 1400 dinarë (11.5 euro) për kilogram në supermarkete. Të..

botuar më 25-04-17 5.59.MD

Më 4 qershor, do të shpallin raportin mbi gatishmërinë e Bullgarisë për të vërë euron në qarkullim

Komisioni Evropian caktoi datën 4 qershor për publikimin e raportit të jashtëzakonshëm të konvergjencës mbi gatishmërinë e Bullgarisë për të adoptuar euron . Raporti do të publikohet gjatë ciklit pranveror të Semestrit Evropian. Informacioni u..

botuar më 25-04-17 10.01.PD