Ministri i Jashtëm Georg Georgiev theksoi mbështetjen e vazhdueshme të Bullgarisë për sovranitetin, pavarësinë dhe integritetin territorial të Ukrainës në Këshillin e Punëve të Jashtme të BE-së në Bruksel, njoftoi Ministria e Jashtme. Georgiev shprehu nevojën për rritje të presionit diplomatik dhe ekonomik në përgjigje të agresionit rus. Këshilli miratoi paketën e 17-të të sanksioneve kundër Rusisë dhe vendosi të heqë sanksionet ekonomike kundër Sirisë.

Lidhur me krizën në Lindjen e Mesme, Ministri i Jashtëm bullgar theksoi nevojën për t'u rikthyer në armëpushim dhe për të liruar pengjet, si dhe shqetësimin për përkeqësimin e situatës humanitare në Gaza. Ai shprehu mbështetje për përpjekjet diplomatike të Shteteve të Bashkuara dhe Katarit, si dhe të partnerëve të tjerë rajonalë.

Në të njëjtën kohë, në Bruksel u mbajt një takim i ministrave të mbrojtjes të komunitetit, me pjesëmarrjen e homologut të tyre britanik. Ministri i Mbrojtjes Atanas Zaprjanov tha se Bullgaria, si shumica e vendeve të tjera anëtare, po përballet me 3 sfida kryesore - modernizimin e shpejtë të forcave të armatosura, përshtatjen e industrisë mbrojtëse me standardet e NATO-s dhe sigurimin e burimeve për këtë, raporton BTA.

Bullgaria mbështeti forcimin e mbrojtjes së të gjithë kufijve tokësorë, ajrorë dhe detarë të BE-së, duke u përqendruar në kufijtë lindorë, përfshirë Detin e Zi, dhe në aftësinë e shteteve anëtare për të kryer të gjithë spektrin e operacioneve, njoftoi Ministria Bullgare e Mbrojtjes.

Redaktoi: Ivo Ivanov

Përgatiti në shqip dhe publikoi: Vesella Mançeva

Foto: mfa.bg