Ngjarjet me adresë ballkanike

botuar më 25-05-31 7.00.PD

Skandal me subvencionet bujqësore të BE-së trazon ujërat në Greqi

Qeveria greke vendosi të mbyllë Organizatën për Pagesa dhe Kontroll të Subvencioneve Komunitare (OPEKEPE), e cila ishte përgjegjëse për dhënien e subvencioneve bujqësore në vend, pas një skandali për shpërdorim të fondeve të BE-së, raportojnë mediat greke, të cituara nga BTA. Aktivitetet e organizatës do të kalojnë në Organin e Pavarur për të Ardhurat Publike. “Kur një nyjë gordiane nuk mund të zgjidhet me këmbëngulje, atëherë duhet të pritet”, komentoi kryeministri Kyriakos Mitsotakis.

Shkak për skandalin u bë ndjekja penale nga Prokuroria Evropiane ndaj rreth njëqind personave në Greqi. Në shkurt, “Politico” raportoi se qytetarët grekë të hetuar kanë marrë pagesa për toka që as nuk i zotërojnë, as i kanë marrë me qira, si dhe për aktivitete bujqësore që nuk i kanë kryer. Rastet datojnë nga viti 2017 deri në vitin 2020, kur pretendohet se të akuzuarit kanë paraqitur deklarata fallco dhe kanë marrë në mënyrë të paligjshme subvencione nga BE-ja. Sipas botimit, fondet e shpërdoruara mund të arrijnë deri në 45 milionë euro në vit.

OPEKEPE menaxhonte çdo vit 3 miliardë euro fonde evropiane në dobi të 680 mijë fermerëve dhe blegtorëve grekë.

Nicușor Dan: Rumania ka nevojë për një ndryshim themelor

Pas gjashtë muajsh paqëndrueshmërie politike në Rumani, më 26 maj bëri betimin presidenti i ri centrist, Nicușor Dan, i cili fitoi raundin e dytë të zgjedhjeve me mbi 53% të votave të zgjedhësve. Këto zgjedhje u mbajtën pasi rezultatet e raundit të parë, i zhvilluar më 24 nëntor 2024, u anuluan nga Gjykata Kushtetuese për shkak të ndërhyrjes së jashtme në favor të kandidatit pro-rus për postin, Călin Georgescu.

“Shteti rumun ka nevojë për një ndryshim themelor”, deklaroi 55-vjeçari Dan, ish-kryetar i Bashkisë së Bukureshtit, pasi bëri betimin si president i vendit. Ai u bëri thirrje rumunëve të vazhdojnë të ushtrojnë “presion pozitiv” për reforma ndaj institucioneve shtetërore. Sipas tij, qeveria e re duhet të drejtohet nga një kryeministër politik, “e jo nga një teknokrat që nuk do të kishte autoritet para politikanëve”.

Paralelisht me negociatat për formimin e qeverisë, pritet të hartohen masa për uljen e shpenzimeve publike me qëllim zvogëlimin e deficitit buxhetor dhe sigurimin e stabilitetit financiar të vendit. Në planin e politikës së jashtme, presidenti i ri i Rumanisë thekson orientimin e tij pro-evropian dhe gatishmërinë për të vazhduar mbështetjen për fqinjin Ukrainë.

Ish-presidenti shqiptar Ilir Meta me akuzë zyrtare për korrupsion

Ish-presidenti shqiptar dhe kreu i partisë së majtë “Partia e Lirisë” Ilir Meta është zyrtarisht i akuzuar për korrupsion, pastrim parash dhe fshehje pasurie nga Struktura e Posaçme Kundër Korrupsionit dhe Krimit të Organizuar (SPAK), raportoi Gazeta Shqiptare. Akuzat zyrtare vijnë shtatë muaj pas arrestimit të Metës në tetor të vitit 2024.

Ish-presidenti shkroi në Facebook se mezi pret “fillimin e procesit gjyqësor, i cili do të jetë publik dhe do t’i tregojë botës se SPAK është një një kukull e Kryeministrit Edi Ramës”. Sipas tij, SPAK është “një Task Force anti-opozitare” e Ramës.

Partia Socialiste në pushtet, e drejtuar nga Rama, fitoi bindshëm zgjedhjet parlamentare më 11 maj, duke siguruar 83 vende në parlamentin me 140 vende.

Meta, i cili ka qenë president i Shqipërisë nga viti 2017 deri në vitin 2022, është një kritik i ashpër i Ramës, të cilin e akuzon për përqendrim të gjithë pushtetit legjislativ, administrativ dhe gjyqësor në duart e tij. Sipas Metës, akuzat ndaj tij janë një sulm politikisht i motivuar ndaj një lideri të opozitës, shkruan BTA. Nëse shpallet fajtor, ai mund të dënohet me deri në 12 vjet burg.

Erdogan shpall fillimin e punës për një Kushtetutë të re në Turqi

Presidenti turk Erdogan njoftoi se ka emëruar një ekip prej 10 juristësh që kanë filluar punën për një Kushtetutë të re për vendin, raportoi TRT Global. Sipas tij, Kushtetuta aktuale, e hartuar dy vite pas grushtit ushtarak të vitit 1980, është e vjetëruar dhe bart ndikimin e regjimit ushtarak.

Sipas kritikëve të Erdogan-it, i cili është në krye të Turqisë si president që nga viti 2014 dhe më parë ka qenë për më shumë se një dekadë kryeministër, kushtetuta e re mund t’i japë mundësinë të qëndrojë në pushtet edhe pas vitit 2028.

Puna për kushtetutën e re nis vetëm disa muaj pas arrestimit të kryetarit të Bashkisë së Stambollit dhe rivalit kryesor të Erdogan-it – Ekrem Imamoglu, i cili akuzohet për korrupsion. Sipas opozitës në vend, arrestimi i Imamoglu-t është politikisht i motivuar.

Përpiloi: Miglena Ivanova

Përgatiti në shqip dhe publikoi: Kostandina Bello

Foto: parapolitika.gr, presidency.ro, gazeta-shqip.com, trthaber.com

Ndaje

Ngjarjet me adresë ballkanike

Ndaje

Më shumë nga rubrika

Parlamenti i bëri thirrje përsëri Maqedonisë së Veriut të përmbushë angazhimet e saj për të drejtat e bullgarëve

Pas Ljupço Georgievskit, prokuroria maqedonase sulmoi edhe një bullgar tjetër, Dragi Karovin

Ngjarjet me adresë ballkanike