Sakar, një nga malet më misterioze dhe pak të njohura në vendin tonë, po bëhet ngadalë por me siguri një destinacion i ri për turizëm të qëndrueshëm. Rajoni, i vendosur midis Rodopeve Lindore dhe Stranxhës, ishte larg flukseve turistike për vite me radhë. Por është pikërisht kjo "paprekshmëri " rezulton të jetë aseti i tij më i madh.

Mihaella Kirçeva, pronare e një baze turistike pranë digës “Studen Klladenec”, merr pjesë me energji dhe përkushtim të jashtëzakonshëm në zhvillimin e zonës si një destinacion për aventurë dhe ekoturizëm. Së bashku me Shoqatën Bullgare për Mbrojtjen e Shpendëve dhe mbështetësit e saj, ajo është e përfshirë në zhvillimin e një faqeje të re interneti – visitsakar.com. Ideja është që të mblidhen në një vend informacione rreth itinerareve, pikave referuese, vendeve për të qëndruar dhe produkteve bujqësore në territorin e malit Sakar.

"E gjithë kjo zonë ka potencial të madh për t'u bërë një destinacion ekoturizmi që përfshin format e tij të ndryshme. Këto janë turizëm aktiv me biçikleta, ecje në natyrë, lloje të ndryshme përvojash kulinare, gastronomi e lidhur me traditat lokale. Qëllimi ynë është që, nëpërmjet iniciativave të ndryshme dhe punës me njerëzit vendas, fermerët, bashkitë dhe bizneset lokale, ta zhvillojmë rajonin si një produkt turistik tërheqës", thotë Mihaella.

Sakar është i ndryshëm nga rajonet tradicionale turistike - nuk ka fluks masiv njerëzish, nuk ka vendpushime të mëdha. Por ka diçka më të vlefshme - një ndjenjë hapësire, heshtjeje, historie. Mali është shtëpia e monumenteve unike megalitike - dolmenëve. Si dhe e njërit prej zogjve më ikonikë në vendin tonë - shqiponjës perandorake. Por ky nuk është destinacioni tradicional turistik, thotë Mihaella dhe shton:

"Përqendrimi më i madh i dolmenëve është në Sakar, dhe pak njerëz e dinë këtë. Ashtu siç shumë pak njerëz e dinë se ky është vendi i shqiponjës perandorake - një specie emblematike me një popullatë shumë të shëndetshme, e lidhur me stilin e jetesës bujqësore. Po përpiqemi t’i ndërthurim këto dy pasuri – natyrore dhe kulturore – me gjithçka tjetër që ofron rajoni – fortesa, zona të mbrojtura, lumenj, shtigje malore… Dolmeni pranë fshatit Hljabovo, për shembull, i njohur si Noçevi Çairi, është një nga më të ruajturit dhe është lehtësisht i arritshëm sepse ndodhet afër rrugës. Ka disa vende të tjera interesante në zonë, siç janë dolmenët në Kliftinova Niva dhe të tjerë."

• Dolmenët mijëvjeçarë – misteri i malit Sakar

• Një numër rekord Shqiponjash Perandorake të Lindjes kanë lindur në Bullgari këtë vit

Vëzhgimi i shqiponjës perandorake është një përvojë e paharrueshme. Megjithatë, kërkon ciceronë me njohuri dhe përvojë. Aktualisht, dy firma ofrojnë vëzhgime të tilla. Ata do ta gjejnë zogun për ju, do t'ju tregojnë se nga ku ta vëzhgoni dhe si të mos e shqetësoni. Kjo nuk është vetëm një shëtitje, por një takim me një nga krijesat më të rralla në natyrën bullgare, thotë Mihaella. Në të njëjtën kohë, u shfaqën operatorët e parë turistikë, të cilët ofrojnë udhëtime të organizuara.

• Bullgaria është ndër destinacionet TOP për vëzhgimin e shpendëve në Evropë

Nëse kërkoni “ekskursion në Sakar” në Google, do të gjeni programe të ndryshme. Mundësia më e lehtë është të regjistroheni për një ekskursion të organizuar për të vizituar fenomenet kryesore. Ose nëse jeni më aventurier, mund të shkoni vetë. Ka vende të mira për të qëndruar në Topollovgrad dhe në fshatra si Oreshnik dhe Mramor. Muzeu Historik në Topollovgrad do t'ju ndihmojë në organizimin e itinerareve. Dhe për turistët individualë, faqja e internetit visitsakar.com do të ofrojë gjurmë GPS që ata do të jenë në gjendje t'i shkarkojnë dhe t'i ndjekin përmes aplikacioneve të tyre mobile" - shpjegoi në përfundim Mihaella Kirçeva.

• Stranxha është për eksplorues dhe njerëz me një shpirt aventuresk

• Qyteti Svilengrad - një qytet i mëndafshit me kala, kisha të lashta dhe një natyrë të egër

Përgatiti në shqip dhe publikoi: Svetllana Dimitrova

Foto: eaglefest.bg