Presidenti turk Rexhep Erdogan u takua në Stamboll me kryeministrin armen Nikoll Pashinyan. Takimi u realizua në sfondin e mungesës së marrëdhënieve diplomatike mes Turqisë dhe Armenisë dhe një kufiri të mbyllur mes tyre. Theksi në bisedime ishte mbi mundësitë për normalizimin e marrëdhënieve mes të dy vendeve, raportoi BTA. Erdogan theksoi se Turqia është e gatshme të ofrojë çdo mbështetje për bisedimet paqësore mes Azerbajxhanit dhe Armenisë. Pashinyan nga ana e tij shkroi në X se "Armenia mbetet e angazhuar për ndërtimin e paqes dhe stabilitetit në rajonin tonë". TRT Global thekson se gjatë vizitës së tij "historike", Pashinyan vizitoi kishën patrarkale armene "Shën Maria" dhe xhaminë madhështore të Sulltanahmetit. Ai u takua gjithashtu me komunitetin armen në Stamboll.

Turqia e njohu zyrtarisht pavarësinë e Armenisë më 24 dhjetor 1991, por të dy vendet nuk kanë marrëdhënie diplomatike. Ndër konfliktet mes tyre është vrasja masive e armenëve në Perandorinë Osmane mes viteve 1915 dhe 1917, e konsideruar si gjenocid nga Armenia dhe shumë vende të tjera, ndërsa Turqia e mohon gjenocidin. Përveç kësaj, në vitin 1993, Turqia e mbylli kufirin e saj me Armeninë në shenjë mbështetjeje për aleatin e saj Azerbajxhanin gjatë luftës për Nagorni Karabakun. Më vonë kufiri ajror u hap, por ai tokësor mbetet i mbyllur. Fillimi i një procesi të normalizimit të marrëdhënieve përmes përfaqësuesve të posaçëm u vendos në vitin 2021. Hapja e kufirit me Turqinë do të sillte përfitime të mëdha ekonomike për Armeninë: tregje më të qasshme, investime dhe rrugë tregtare. Turqia shpreh gatishmëri për të hapur kufirin e saj me Armeninë në rast të normalizimit të marrëdhënieve mes Baku dhe Erevanit.

Lideri i Partisë Kombëtare Liberale Ilie Bolozhan është Kryeministri i ri i Rumanisë. Ai u emërua pas javësh negociatash të tensionuara dhe të vështira mes presidentit, liderëve dhe ekspertëve të katër partive pro-evropiane në parlament – Socialdemokratike dhe Kombëtare Liberale, Bashkimit për Shpëtimin e Rumanisë dhe Unionit Demokratik të Hungarezëve në Rumani, raporton "Radio Rumania International". Edhe pse kabineti ka mbështetje të gjerë në parlament, mandati i tij do të jetë i vështirë. Detyra kryesore e qeverisë së re do të jetë ulja e deficitit nëntë përqind të vendit – më i madhi në BE, si dhe justifikimi i pritshmërive të larta të votuesve për luftën kundër korrupsionit, komenton “Evropa e Lirë – Bullgaria”. 

Bolozhan është i njohur për prirjen e tij për të marrë vendime të vështira dhe madje jopopullore për bashkëpartiakët e tij. Ai ka reputacionin e një politikani pragmatik dhe reformatori. Si kryetar bashkie i Oradjas nga viti 2008 deri në vitin 2020, ai uli buxhetin e qytetit me gati 30%, uli numrin e punonjësve në administratën publike lokale me pothuajse një të tretën dhe arriti të modernizojë infrastrukturën urbane.

Një Kod i ri për qarkullimin rrugor hyri në fuqi në Greqi me qëllim që të ulë aksidentet rrugore dhe sjelljen e rrezikshme në rrugë, njofton botimi elektronik "Ohronos". Ndryshimet futin një sërë sanksionesh më të rrepta dhe masa kontrolli, duke përfshirë njoftim elektronik dhe heqje të patentës, video-monitorim përmes kamerave të vendosura në korsitë e autobusëve. Kontrolli është forcuar jo vetëm në qytetet e mëdha, por edhe në ishuj, veçanërisht në zonat turistike, ku rreziku nga aksidentet është tradicionalisht më i lartë. 

Vetëm në periudhën nga 12 deri më 16 qershor në rajonin Atika janë kryer mbi 16 000 kontrolle, gjatë të cilave janë konstatuar mbi 1600 shkelje. Ndër më të shpeshtat janë drejtimi pa rrip sigurimi, përdorimi i telefonit gjatë drejtimit të mjetit dhe tejkalimi i shpejtësisë, raportoi korrespondentja e BNR në Greqi, Katja Peeva.

Edicioni i 25-të i njërit prej festivaleve më të mëdha muzikore në Evropë – EXIT, do të zhvillohet për herë të fundit këtë vit në Serbi nga data 10 deri më 13 korrik në vendin e tij tradicional – kalaja Petrovaradin në Novi Sad, pas së cilës largohet nga vendi. Arsyeja është ndërprerja e mbështetjes financiare nga shteti, pasi festivali shprehu mbështetje për studentët protestues serbë kundër korrupsionit, raportoi BTA. “Që kur u rreshtuam publikisht në krah të studentëve serbë në luftën e tyre për një shoqëri më të lirë dhe më të drejtë, ne u ekspozuam ndaj një presioni të madh financiar dhe politik, me qëllim të na hiqet e drejta themelore për lirinë e mendimit dhe të shprehjes”, deklaruan organizatorët.

Themeluesi i festivalit, Dushan Kovaçevic, njoftoi se po zhvillon negociata për mbajtjen e festivalit me moton “EXIT në mërgim” nga viti 2026. Ftesa tashmë kanë ardhur nga Gjermania, disa vende ballkanike dhe Egjipti. Në vitin 2024, EXIT është vizituar nga 210 000 persona nga mbi 80 shtete.

Foto: @NikolPashinyan/X, ЕPA/BGNES, tovima.com, exitfest.org