Një milion automjete kaluan që nga fillimi i vitit në pikën kufitare greke Promahon, në kufirin me Bullgarinë (përballë pikës kufitare Kullata), deklaroi për televizionin shtetëror grek ERT kryetari i Bashkimit të Punonjësve të Policisë të prefekturës greke Serres, Janis Kunjos, njoftoi BTA. Trafiku është rritur me 30% pas heqjes së kontrollit të pasaportave.

Sot, komisioneri evropian për punët e brendshme dhe migracionin, Magnus Bruner, është për vizitë në Bullgari. Në programin e vizitës së tij është përfshirë edhe pika kufitare Kullata – Promahon. Në një takim me komisionerin evropian, kryeministri Rosen Zheljazkov theksoi se Bullgaria kontribuon ndjeshëm për sigurinë e hapësirës Shengen. Mbrojtja e kufirit të jashtëm të BE-së dhe parandalimi i migracionit të paligjshëm mbeten përparësi kryesore për vendin tonë. Ai theksoi gjithashtu mbështetjen e dhënë nga Komisioni Evropian për vendin tonë, me vlerë mbi 300 milionë euro gjatë tre viteve të fundit – për monitorim të integruar të kufirit, automjete të përshtatshme për terrene të vështira dhe dronë.

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: BTA