Ministrat e financave të Eurogrupit konfirmuan të hënën kursin me të cilin leva bullgare do të këmbehet në euro pas anëtarësimit të Bullgarisë në eurozonë, duke e ruajtur atë në nivelin 1.95583 leva për 1 euro. Këtë e njoftoi kryetari i Eurogrupit, Paschal Donohoe.

Sot, Parlamenti Evropian në Strasburg dhe Këshilli i Çështjeve Ekonomike dhe Financiare në Bruksel pritet të marrin vendimin përfundimtar për pranimin e Bullgarisë në eurozonë duke filluar nga 1 janar 2026. Për një vlerësim pozitiv kërkohet shumicë e cilësuar, jo unanimitet. Nuk priten surpriza, pasi shtetet anëtare dhe liderët evropianë tashmë unanimisht rekomanduan që Bullgaria të adoptojë euron nga fillimi i vitit të ardhshëm, njoftoi nga Brukseli korrespondentja e BNR, Angelina Piskova.

Këshilli i Bashkimit Evropian për Çështjet Ekonomike dhe Financiare (ECOFIN) pritet të miratojë sot tre akte ligjore – për pranimin e euros nga Bullgaria, për vendosjen e euros në Bullgari dhe për kursin e këmbimit të euros për Bullgarinë – me të cilat do të zyrtarizohet përfundimisht anëtarësimi i Bullgarisë në eurozonë më 01.01.2026.

Për sot u shpallën dy protesta kundër vendosjes së euros në Bullgari. Paradite, nisma qytetare "Buditeli" do të organizojë protestë përpara ndërtesës së Përfaqësisë së Komisionit Evropian në Sofje.

Protesta e dytë u shpall për sonte në të ashtuquajturin “Trekëndëshi i pushtetit” – hapësira midis Kuvendit Popullor, Këshillit të Ministrave dhe Presidencës, njoftoi BNR "Horizont". Kjo protestë mbështetet nga tre parti të përfaqësuara në parlament – "Vëzrazhdane", "Veliçie" dhe MEÇ.

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: BTA