“Kur flasim për integrimin evropian, duhet të mos ndalemi vetëm tek detyrat teknike, por ta kthejmë atë në një debat kombëtar mbi çfarë do të thotë të jesh pjesë e BE-së, çfarë përgjegjësish sjell dhe çfarë përfitimesh u ofron qytetarëve tanë,” deklaroi ajo. Znj. Spiropali shtoi se në Shqipëri 95% e qytetarëve mbështesin integrimin evropian dhe e shohin BE-në si “familjen natyrore” të vendit. Ajo kujtoi periudhën e izolimit komunist, kur Evropa për shqiptarët ishte një ëndërr që dëgjohej vetëm në radiot italiane, dhe e përshkroi procesin e integrimit si një mundësi transformimi për vendin.

Në konferencën për shtyp të mbajtur pas takimit me Kryetaren e Parlamentit bullgar, znj. Spiropali theksoi se Shqipëria është thellësisht e përkushtuar ndaj çështjeve të sigurisë rajonale dhe ka hyrë në një bashkëpunim trepalësh me Kosovën dhe Kroacinë, duke shprehur dëshirën që Bullgaria t’i bashkohet kësaj nisme. “Qëllimi ynë është t’u përgjigjemi në mënyrë efektive sfidave të sigurisë, të forcojmë kapacitetet mbrojtëse dhe të sigurojmë paqen në një situatë delikate e të ndikuar nga zhvillime të vështira ndërkombëtare,” tha ajo. Kryetarja e Parlamentit shqiptar nënvizoi gjithashtu rëndësinë që kontaktet e shkëlqyera politike të përkthehen në bashkëpunim ekonomik, tregtar dhe turistik.

Gjatë vizitës së saj, znj. Spiropali vendosi gjithashtu një kurorë pranë Monumentit të Ushtarit të Panjohur, si shenjë nderimi për historinë dhe miqësinë mes dy popujve.