A e ngatërrojnë konsumatorin bullgar çmimet e dyfishta në euro dhe leva?

botuar më 25-09-01 4.30.MD

Foto: BGNES

Që nga 8 gushti 2025, ka hyrë në fuqi tregimi i detyrueshëm i çmimeve për të gjitha mallrat dhe shërbimet në dy valuta - në leva bullgare dhe në euro. Ky detyrim do të mbetet i vlefshëm për tregtarët për një periudhë prej një viti - deri më 8 gusht 2026, thuhet në ligj.

Shënimi i çmimeve, megjithatë, shpesh çon në konfuzion nga ana e konsumatorëve, dhe jo rrallë në disa dyqane bëhet në një mënyrë që e vështirëson orientimin e klientëve. Е shqyrtuam problemin me Bogomill Nikollov, drejtor ekzekutiv i Shoqatës Kombëtare Bullgare "Konsumatorët Aktivë".

Bogomill Nikollov

"Në fillim, pati konfuzion, pasi disa tregtarë filluan të njoftonin dy monedhat përpara se të kishte një fushatë informuese. Njerëzit me të vërtetë nuk e dinin se çfarë ishin këto numra të çuditshëm dhe të rinj që shfaqeshin në etiketa. Dhe, natyrisht, disa njerëz i njohën ato si promovime dhe vendosën se kjo ishte një lloj uljeje çmimesh. Kjo ndodhi një ose dy muaj më parë. Tani, mendoj se nuk ka njeri që nuk e di se ka dy çmime", theksoi Bogomill Nikollov.

Aktualisht, problemi është i ndryshëm - nëse ka ankesa, ato lidhen me çmime të dyfishta të shkruara gabimisht, ose çmime që mungojnë fare, shtoi kryetari i organizatës së konsumatorëve. Një faktor tjetër është shtyrja nga shteti në lidhje me vendosjen e gjobave, duke u dhënë tregtarëve një "dritare" deri më 8 tetor për të mos shpallur çmimet në euro.

"Mendoj se kjo do të na japë neve si konsumatorë kohë të mjaftueshme për t'u mësuar me të dyja çmimet. Në këtë fazë, rreziqet për konsumatorët janë ende të vogla, sepse ne vazhdojmë të lexojmë etiketat në leva dhe të paguajmë në leva. Pjesa e vështirë do të vijë më 2 janar, kur papritmas do të jemi në gjendje të paguajmë në të dyja monedhat. Dhe nga përvoja e vendeve të tjera, e di që brenda dy javësh maksimumi, monedha e vjetër thjesht do të zhduket nga qarkullimi. Dhe pastaj njerëzit që kanë menduar dhe llogaritur në leva gjithë jetën e tyre do të duhet të ripërshtaten. Sigurisht që këto katër muaj në të cilët kemi etiketa të dyfishta duhet të na ndihmojnë të ripërshtatemi."

Rreziku i vërtetë vjen me qarkullimin e dyfishtë brenda muajit të parë të vitit të ri 2026 - nga 1 janari deri më 31 janar, kur do të pranohen të dy monedhat.

"Tregtari duhet të bëjë llogaritjet shumë shpejt dhe probabiliteti i llogaritjeve në dëmin tonë është realist. Domethënë, ne duhet të bëjmë llogaritjet në të njëjtën kohë me të. Dhe për këtë arsye po i këshillojmë njerëzit që tani e tutje - në janar, mos i shpenzoni levat e mbetura në xhepa, por tërhiqni direkt eurot. Paratë që ju kanë mbetur, ndërroni në bankë, kjo bëhet pa komision dhe tarifë. Sepse nëse blejmë me leva dhe na japin kusur në euro, rreziqet e gabimeve të tilla rriten", theksoi Nikollov.

Sigurisht, ekziston edhe rreziku i përpjekjeve nga grupe të caktuara kriminale për të spekuluar me kartëmonedha euro të falsifikuara, prandaj mënyra më e besueshme për të shkëmbyer para është përmes bankave, këshillon ai. Një këshillë tjetër është të paguani me kartë, gjë që do të eliminonte rrezikun e falsifikimit të kusurit.

Rreziku i parave të falsifikuara! Si t’i dallojmë ato?

Monedhat euro bullgare do të “flasin” për historinë dhe shpirtin kombëtar

"Nuk mund të mendoj një rekomandim më të besueshëm sesa të paguajmë me kartë kurdo dhe kudo që të mundemi", theksoi kreu i organizatës së konsumatorëve. Ai gjithashtu nuk kurseu kritikat për rolin e institucioneve shtetërore - sipas tij, fushata për euron është shumë e vonuar, veçanërisht në komunikimin me konsumatorët. Megjithatë, kjo ka shumë të ngjarë të kompensohet deri në Vitin e Ri, beson ai.

Ashtu si me çdo temë, përdoruesit janë të ndarë në mendime rreth saj.

“Nuk kam asnjë ngatërresë me çmimet në euro dhe leva. Të moshuarit ngatërrohen nga kjo. Mund të orientohem lehtësisht në dyqan, së pari shoh çmimet në leva dhe pastaj në euro", thotë Pllamen, një i ri nga Sofja.

Rritja e çmimeve është për shkak të "obsesionit të disa tregtarëve për t'u pasuruar shpejt", beson Sergej, një mjek në një spital të madh metropolitan.

"Për shkak të injorancës masive të njerëzve dhe frikës masive, çmimet po rriten ndjeshëm", thekson ai.

Ekonomia e pritshmërisë– si frika nga rritja e çmimeve në fakt çon në rritjen e çmimeve

Pavarësisht diskutimit të nxehtë dhe shumë opinioneve "pro" dhe "kundër" euros, një gjë është e sigurt - njerëzit nga të gjitha klasat shoqërore, si kundërshtarët, ashtu edhe mbështetësit e miratimit të monedhës së vetme evropiane, po bëhen gjithnjë e më të informuar, gjë që nga ana tjetër çon në një ulje të rrezikut të mashtrimit.