Devin - "qyteti i ujërave minerale", ndodhet në një nga rajonet më piktoreske të Bullgarisë - i fshehur në pjesën jugperëndimore të vargmalit më të gjerë bullgar, Rodopet, përgjatë lumit Vëça. Në afërsi të tij ndodhen dhjetëra monumente natyrore dhe historike, dhe uji mineral është i famshëm për cilësitë e tij të shkëlqyera. Kjo është arsyeja pse turistët nga Bullgaria dhe jashtë vendit dynden këtu gjatë gjithë vitit. Nëse e gjeni veten në këtë cep qiellor të atdheut tonë në javën e dytë të gushtit, keni mundësinë të bashkoheni me Festivalin e Devinit dhe Ujit Mineral.

Turizmi është një nga burimet kryesore të jetesës në rajon dhe autoritetet lokale raportojnë një bazë të zhvilluar mirë të akomodimit - në bashki janë të regjistruara 151 vende turistike me 2236 shtretër - tha për Radio Bullgarinë nënkryetari i Bashkisë së Devinit, inxhineri Nikollaj Jurukov.

"Shumica e turistëve që vizitojnë komunën tonë janë bullgarë, por rreth 10% janë të huaj - ne mirëpresim mysafirë nga Izraeli, Britania e Madhe, Gjermania, Greqia, Belgjika, Italia, Rumania, Holanda, Franca. Kishte gjithashtu mysafirë nga Rusia, SHBA-ja, Turqia, Ukraina, pothuajse nga e gjithë bota. Vitet e fundit, Devin është vendosur si një destinacion turistik dhe SPA, falë ujërave minerale, pamjeve që kemi, karakteristikave natyrore. Dhe, sigurisht, falë infrastrukturës që është ndërtuar për të mirëpritur këta turistë - hotele, eko-shtigje, platforma panoramike dhe shumë vende të tjera për t'u vizituar", vuri në dukje Jurukov.

• Mbi gryka, fusha dhe lumenj - ku janë platformat më të bukura panoramike në Bullgari?

• Hapi dyert Muzeu i Spiritualitetit në Shiroka Llëka 

Edhe pse është një qytet relativisht i vogël, me 6 016 banorë të përhershëm sipas regjistrimit të fundit, Devin dhe rrethinat e tij janë një vend ku turistët e etur për përjetime të paharrueshme nuk mund të mërziten:

"Për një javë ose 10 ditë mund të vizitoni vende pa i përsëritur ato - shpella, shtigje ekologjike, fshatra, aty pranë janë Shiroka Llëka, Pamporovo, Djavollskoto Gërllo (Gryka e Djallit).  Devini ndodhet në një vend qendror në Rodopet Perëndimore, katër pjesë të malit takohen këtu, si dhe të gjithë lumenjtë e mëdhenj në zonë, të cilët kanë një pellg natyror ujëmbledhës në lumin Vëça - një vend tërheqës për turizëm."

Megjithatë, cila është situata ekonomike dhe demografike në Devin - qyteti i tretë më i madh në rajonin e Smoljanit?

"Punëdhënësit kryesorë janë në sektorin e turizmit dhe, sigurisht, kompanitë e mëdha të mbushjes së shisheve. Rreth tyre, ka edhe shumë aktivitete shoqëruese - kompani transporti dhe riparimi dhe të tjera që ndihmojnë me mbushjen dhe transportimin e ujit mineral në të gjitha vendet në Bullgari. Falë këtyre fabrikave, shumë njerëz kanë mbetur në Devin. Kjo do të thotë që ka më shumë fëmijë në shkollë, ka nevojë për më shumë institucione tregtare dhe më shumë aktivitete shoqëruese rreth tyre. Mund të thuhet se me kalimin e viteve dhe tani fabrikat kanë pasur një ndikim jashtëzakonisht të mirë në ekonominë dhe politikën demografike të qytetit", komentoi nënkryetari i bashkisë së Devinit.

Përveç kësaj, bashkia ka disa fabrika qepjeje, një fabrikë për pjesë metalike dhe druri, mjaft njerëz punojnë në ekonomitë pyjore dhe të gjuetisë në zonë, si dhe në institucionet publike. Ka gjithashtu shumë blegtorë, që rrisin kryesisht dele dhe lopë, si dhe disa punishte qumështi. Përveç kësaj, në Devin ndodhet edhe një spital i specializuar rehabilitimi - "Aktiviteti i tij nuk është turistik, por ka shumë njerëz që e vizitojnë atë dhe pas procedurave dalin për një shëtitje në qytet, përdorin restorantet dhe dyqanet lokale, dhe kështu ndihmojnë ekonominë", shpjegon nënkryetari i bashkisë.

Devini është si një oazë e vogël në zemër të Rodopeve Perëndimore, duke ruajtur si popullsinë dhe jetesën e saj, ashtu edhe burimet e pasura natyrore. Dhe turisti, pasi e ka gjetur veten në këtë mal më të gjerë bullgar, largohet "i magjepsur" përgjithmonë nga ngjyra e traditave lokale, nga shpatet e gjelbra dhe pyjet madhështore, nga ushqimi i shijshëm dhe mikpritja e popullit të Rodopeve, dhe nga pafundësia е fshehur në zemër.

Lexoni më shumë në arkivin e Radio Bullgarisë:

• Në Rodopet tingulli i gajdes është një magji, për të cilën tregon një muze lokal

• Shijoni bukurinë e Jagodinës!

• Rodopet në top dhjetëshen e klasifikimit evropian të National Geographic Traveler

• Devin – destinacion spa ose ekologjik?

Përgatiti në shqip dhe publikoi: Vesella Mançeva

Foto: Bashkia e Devinit, Pixabay, arkiv personal, Veneta Nikollova, devin.bg