Eurodeputeti Ilija Llazarov deklaroi në qytetin Ruse se do të lobojë për ndërtimin e disa shluzave në pjesën bullgare të lumit Danub. Qëllimi i këtyre shluzave është të mbajnë nivelin e ujit në lumë dhe të mundësojnë lundrim gjatë gjithë vitit, përfshirë edhe sezonin e thatë të verës. “Ky projekt nuk do të realizohet brenda këtij mandati, por nëse të paktën mund të nisim të punojmë mbi temën, do të jetë me rëndësi për të gjithë rajonin. Do t’i hapë rajonit perspektiva më të mira ekonomike”, u shpreh Llazarov, i cili është gjithashtu nënkryetar i ndërgrupit për detet, lumenjtë, ishujt dhe zonat bregdetare në Parlamentin Evropian. “Ruse është një qytet strategjik, qyteti më evropian bullgar gjatë gjithë historisë sonë moderne dhe me lidhjet më të forta me Vjenën dhe Evropën. Ne i kemi një borxh të madh Bullgarisë së Veriut”, theksoi gjithashtu eurodeputeti.

Redaktoi: Ivo Ivanov

Përgatiti në shqip dhe publikoi: Svetllana Dimitrova

Foto: BTA