Me ndërtimin e Korridorit Vertikal të Gazit, Bullgaria do të ruajë pozicionin e saj strategjik në rajonin e Evropës Juglindore. Këtë e siguroi ministri i energjisë, Zheço Stankov, i cili, së bashku me komisionerin evropian për energjinë, Dan Jorgensen, inspektoi realizimin e pjesës së tretë të projektit – nga Rupça deri në Vetrino. Ky projekt i madh gazsjellësi do të lidhë Greqinë, Bullgarinë, Rumaninë, Moldavinë, Ukrainën, Hungarinë dhe Sllovakinë. Sipas fjalëve të Stankovit, përmes Korridorit Vertikal të Gazit, vendi ynë do të transportojë sasi edhe më të mëdha gazi në të gjitha drejtimet. Projekti do të përfundojë plotësisht deri në fund të vitit 2026, theksoi ministri. Ai shtoi se zbatimi i tij do t’i garantojë Bullgarisë dyfishimin e kapacitetit në pikën e daljes me Rumaninë – nga 5 miliardë metra kub transporti aktual, kapaciteti do të arrijë deri në 10 miliardë metra kub, njofton BTA.

Vlladimir Malinov, drejtor ekzekutiv i “Bulgartransgaz”, vuri në dukje rëndësinë e ndërtimit të këtij korridori në një kohë kur Evropa është në prag të heqjes përfundimtare nga gazi natyror rus dhe në planin afatgjatë do të mbështetet në gazin natyror të lëngshëm nga SHBA-të ose në furnizime nga rajone të tjera, përfshirë rajonin e Kaspikut.

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: BTA, BGNES,