Qeveria miratoi një program të ri për mbështetjen e organizatave të komuniteteve bullgare në Shqipëri, Serbi, Kosovë, Ukrainë dhe Moldavi, si dhe të qytetarëve nga Maqedonia e Veriut me vetëdije bullgare, për periudhën 15 tetor 2025 – 31 dhjetor 2029, njoftoi shërbimi për shtyp i qeverisë.

Kabineti miratoi gjithashtu shpenzime shtesë në buxhetin e Ministrisë së Punëve të Jashtme për vitin 2025, deri në 1.7 milion leva, për zbatimin e programit gjatë këtij viti. Këto mjete do të përdoren për financimin e projekteve të komuniteteve bullgare në Shqipëri, Serbi, Kosovë, Maqedoninë e Veriut, Ukrainë dhe Moldavi.

Mbështetja financiare është pjesë e angazhimit të shtetit ndaj komuniteteve historike bullgare dhe qytetarëve jashtë vendit, të cilët janë bartës të një potenciali të konsiderueshëm intelektual, financiar-ekonomik dhe demografik. Programi i miratuar siguron mundësi dhe mekanizma të rinj për përfshirjen e qytetarëve bullgarë jashtë vendit në jetën shtetërore dhe shoqërore-politike në Bullgari, si dhe për ruajtjen e hapësirës etnokulturore bullgare dhe forcimin e imazhit pozitiv të Bullgarisë, shtohet më tej në njoftimin e qeverisë.

Redaktoi: Ivo Ivanov

Përgatiti në shqip dhe publikoi: Svetllana Dimitrova

Foto: government.bg