Demokracia perceptohet vazhdimisht nga një shumicë e fortë në shoqërinë bullgare si forma më e mirë e qeverisjes. Përafërsisht 1.5 milion qytetarë deklarojnë gatishmërinë e tyre për të rrezikuar sigurinë e tyre personale për ta mbrojtur atë, sipas një studimi përfaqësues nga Alpha Research, të porositur nga Instituti “Shoqëria e Hapur”.

58% e të anketuarve besojnë se demokracia është forma më e mirë e qeverisjes. Në vitin 2023, 63 për qind e të anketuarve kishin të njëjtin mendim. 28% janë të mendimit të kundërt. Mbështetja për demokracinë është më e larta në Sofje, 70%. Më të arsimuarit e mbështesin demokracinë në një masë më të madhe. Sipas preferencave partiake, ata që miratojnë qeverisjen demokratike janë më shumë midis mbështetësve të së djathtës urbane (90%) dhe partisë GERB (79%).

Por gjysma e popullsisë së rritur gjithashtu mbështet një udhëheqës të fortë që do të qeveriste me teknokratë.

Kur u pyetën nëse do të pranonin të kufizonin përkohësisht disa nga të drejtat dhe liritë demokratike, 46% u përgjigjën "jo", 41% do të pranonin kufizime.

Çdo i treti bullgar i rritur është gati të rrezikojë jetën e tij personale për të mbrojtur demokracinë. Çdo i pesti (rreth 1 milion njerëz) deklaron gatishmëri për t'u bërë vullnetar në rast lufte.

Njerëzit e moshës 45 deri në 59 vjeç kanë më shumë gjasa sesa ata në grupmoshat e tjera të jenë të gatshëm të mbrojnë demokracinë me koston e marrjes së rrezikut personal, tregon anketa.

Redaktoi: Ivo Ivanov

Përgatiti në shqip dhe publikoi: Vesella Mançeva

Foto: BGNES