Ivo Ivanov nga Radio Bullgaria përfundoi me sukses masterclass-in e XI-të të BNR-së

Akademia e BNR-së diplomon një brez të ri dhe tashmë do të trajnojë edhe studentë

botuar më 25-11-18 7.30.PD

Foto: Krasimir Martinov

Në një ceremoni festive u dorëzuan diplomat e masterclass-it të XI-të për radiogazetari të Radios Kombëtare Bullgare – Akademia e BNR-së. Aktivitetet që ndërthurnin leksione me praktikë në formatet bashkëkohore të gazetarisë radiofonike pasurojnë njohuritë dhe aftësitë profesionale të gazetarëve aktivë në programet kombëtare dhe rajonale të radios publike.

“Edhe pse punojmë në vende të ndryshme, në programe të ndryshme, gjithmonë i kemi zgjatur dorën njëri-tjetrit. Faleminderit për pjesëmarrjen tuaj dhe shpresoj që gjithçka që keni mësuar këtu të arrini ta zbatoni me sukses në të ardhmen në BNR”, tha në hapjen e ceremonisë festive një nga lektorët – Zllatko Zhelev, drejtues i një njësie në Drejtorinë e “Programeve Digjitale” të BNR-së.

Diplomat për përfundimin me sukses të masterclass-it u dorëzuan nga Dimitër Abrashev, anëtar i Këshillit Drejtues të Radios, me fjalët:

“Ju falënderoj që u përfshitë në këtë masterclass. Edhe ne mësuam diçka nga ju, edhe ju mësuat diçka nga ne. Ka shpresë në gazetari dhe kushdo që thotë se gazetaria po vdes si profesion, gabon thellë. Mund të njihet me secilin prej jush dhe të bindet për të kundërtën.”

Ndër shtatë gazetarët e BNR-së që përfunduan masterclass-in, të përzgjedhur me konkurs për trajnim sipas programit të departamentit të kualifikimit të EBU ACADEMY, është edhe kolegu ynë Ivo Ivanov.

Historian me arsim, krijues i programeve televizive për histori dhe turizëm, autor i disa prej materialeve tona më interesante të lidhura me historinë bullgare, me interes të veçantë për rajonin e Ballkanit, pjesë e ekipit informativ të Radio Bullgarisë, Ivo Ivanov ka përvojë shumëvjeçare në profesionin e gazetarisë. Megjithatë, ai është i bindur se njeriu gjithmonë mund të mësojë diçka të re.

“Kam mësuar shumë për punën me audion. Në një radio audioja është gjithçka, ndaj kjo për mua ishte shumë e dobishme. Kam bërë disa hapa me kohën, duke mësuar shumë gjëra të reja dhe moderne që po hyjnë në media, si inteligjenca artificiale. Duhet ta pranoj se jam i impresionuar, madje edhe i shqetësuar. Interesantë ishin rastet që na u paraqitën – liria e medias, veprimi i gazetarëve nën presion, kur u duhet të punojnë në kushte të tilla, e kështu me radhë. Ka gjëra për të cilat njeriu duhet gjithmonë në hap me kohën, sepse bota zhvillohet. Sado të mendojmë se e ndjekim këtë zhvillim, shpesh mbetemi prapa ngjarjeve,” – rrëfen Ivo Ivanov.

Pasi përfundoi me sukses 12 disiplina të ndryshme, të lidhura me aftësi teknike, mbledhjen e lajmeve, etikën, reportazhet në epokën digjitale dhe të tjera, duke dhënë zemrën dhe shpirtin për të ngritur më lart aftësitë e tij dhe për të qenë i dobishëm për radion, Ivo u rekomandon të gjithë kolegëve që të jenë aktivë dhe të marrin pjesë në masterclass-et e ardhshme të BNR-së për radiogazetari:

“Në vend që të hezitojnë – le ta bëjnë! Në shikim të parë Akademia është një angazhim, por është organizuar në mënyrë aq dinamike, saqë njeriu shumë shpejt mësohet me ambientin, me detyrat që vendosen. Ato nuk janë të parealizueshme, përkundrazi janë drejtpërdrejt të lidhura me punën tonë. Prandaj është shumë interesante.”

Ndërkohë Akademia po zhvillohet dhe tashmë pret nxënësit e saj të rinj – këtë herë studentët e Fakultetit të Gazetarisë të Universitetit të Sofjes. Kështu Radioja Kombëtare Bullgare realisht do të kontribuojë për formimin e brezit të ri të gazetarëve në vend. “Sinqerisht shpresoj që të shohim pjesë të këtyre kolegëve edhe në ekipin tonë,” – uroi Zllatko Zhelev.

Përgatiti në shqip dhe publikoi: Kostandina Bello

Foto: Krasimir Martinov, Elena Karkallanova

Video: Elena Karkallanova

Последвайте ни и в Google News Showcase, за да научите най-важното от деня!