Rusia është një partnere e rëndësishme e Bullgarisë në sferën energjetike, e cila zë një vend prijës në marrëdhëniet bilaterale. Këtë e nënvizoi Kryetarja e Kuvendit Popullor Cveta Karajançeva në Moskë në takimin me Kryetaren e Këshillit të Asamblesë Federale të Rusisë Valentina Matvienko. Karajançeva shtoi se Bullgaria e përkrah mundësinë për degëzimin e “Rrymës Turke” përmes territorit të saj drejt Serbisë dhe Evropës. “Me këtë tubacion do të arrihet një diversifikim i furnizimeve të gazit dhe çmime konkurruese për Bullgarinë dhe për Evropën”, vuri në dukje Karajançeva. Ajo shprehu dëshirën e vendit tonë për vazhdimin e bashkëpunimit me Rusinë në ekonomi, transport, shkencë dhe kulturë, por edhe shqetësimin për shkak të uljes në këmbimin bilateral të mallrave gjatë vitit 2018 në krahasim me vitin 2017 dhe më në veçanti për pakësimin e eksportit bullgar.
