“Ende nuk jemi në gjendje të miratojmë kornizën negociuese për Republikën e Maqedonisë së Veriut.” Këtë e tha në një brifing zëvendës kryeministrja dhe ministre e punëve të jashtme Ekaterina Zaharieva.
Sipas saj pala maqedonase shkel sistematikisht Marrëveshjen e Fqinjësisë së Mirë, krijon pengesa për investimet bullgare, nuk bën hapa për kapërcimin e gjuhës së urrejtjes.
“Pozita e kryeministrit Bojko Borisov dhe e qeverisë bullgare është dashamirëse, por nuk do të tolerojë kompromise të cilat çojnë në fushatë antibullgare. Do të jetë e vështirë për mbarë BE-në të kemi çështje të hapura. Edhe tani ka shembuj të tillë që nuk janë të këndshëm”, tha ministrja Zaharieva.
Sipas saj akoma ka shans të arrihet pajtim mbi kornizën negociuese. “Nuk ka shumë kohë, por fakti, se presidenca gjermane e Këshillit të BE-së është e angazhuar me procesin jep indikacione të mira. Do të jetë në dëm të Shkupit në se ai nuk dëshiron të përfshihet në suazën e caktuar”, tha ministrja Zaharieva.
Maqedonia e Veriut dhe Bullgaria duhet të përballojnë dallimet e tyre deri më 10 nëntor, kur ka për t’u realizuar takimi i ministrave të punëve të jashtme të shteteve të BE-së, në të cilin duhet të miratohet korniza negociuese.
