Qeveria bullgare miratoi një listë me kushte për Maqedoninë e Veriut, të cilat Shkupi duhet t’i zbatojë para se të fillojnë negociatat reale me vendin për integrim në BE. Ministrja e Punëve të Jashtme Ekaterina Zharieva deklaroi se Sofja do të bllokojë fillimin e bisedimeve me Shkupin, në qoftë se Maqedonia e Veriut nuk deklaron se heq dorë nga pretendimet e saj për ekzistencën e minoritetit maqedonas në Bullgari. Vendi ynë ngul këmbë gjithashtu që Shkupi të kufizojë gjuhën e urrejtjes në mediat publike të financuara nga shteti, të ndryshohen librat mësimorë të historisë dhe të gjeografisë dhe të rehabilitohen viktimat e regjimit komunist në Jugosllavi, të persekutuar për shkak të vetëdijes së tyre bullgare.