Nga 13 shtatori 7 vende të BE-së – Spanja, Rumania, Bullgaria, Kroacia, Hungaria, Çekia dhe Malta, karakterizohen si shqetësuese për përhapjen e Covid-19. Këtë e paralajmëron Qendra Evropiane për Kontrollimin dhe Parandalimin e Sëmundjeve.

Drejtoresha e qendrës në Stokholm Andrea Ammon njoftoi, se ka tri grupe vendesh – me rrezik të ulët, të matur dhe të lartë. “Vendet e grupit të fundit janë me tendenca tepër shqetësuese. Në to shihet rritje e numrit të të infektuarve, shtim i raportit midis pacientëve të hospitalizuar dhe pacientëve me simptoma të ashpra të sëmundjes. Në këto vende shihet edhe rritje e numrit të të vdekurve. Aty risku është i madh sidomos për njerëzit me sëmundje të ndryshme.”