Një kopsht jo të zakontë nis jetën e vet në Sofje. Dhe mos mendoni se kjo është një hapësirë ​​e pazakontë e gjelbër. Mënyra në të cilën ajo lindi është atipike - së pari në ëndrrat e fëmijëve nga një shkollë në Sofje, dhe pastaj nga puna e përbashkët e prindërve, mësuesve dhe vetë fëmijëve. Dhe sot, kur të gjithë fëmijët në Bullgari festojnë pritet që kopshti të jetë pjesë nga festa, me të cilën nxënësit e klasave të para do të shënojnë grumbullimin e diturive të tyre fillestare dhe gëzimin e transformimit të mjedisit me punën dhe idetë e tyre. Prandaj e quajtën “Kopsht të Gëzimit”.

Sijana, Joana, Bllagovesta dhe Dimana e dinë se nuk duhet të ketë copa të mëdha toke nëse duan të mbjellin bimë aromatike dhe lule në kopshtin e tyre. Vajzat po përfundojnë klasën e parë dhe thonë se orët mësimore të “Botës Përreth” janë ndër të preferuarat prej tyre, pasi ato mësojnë shumë për bimët dhe kafshët. Në fakt, këto orë janë vetëm një herë në javë. Prandaj, mësuesit e tyre vendosën që ta plotësojnë programin mësimor me pak përgatitje praktike.

“Duke punuar në kopsht fëmijët mësojnë të punojnë bashkë me natyrën dhe për natyrën, duke mësuar dhe duke aplikuar parimet e zhvillimit të qëndrueshëm të ekosistemeve. Në mënyrë që natyra të marrë një kuptim personal për fëmijën, ai duhet t’i afrohet asaj me gëzim dhe interes. Dhe këtu është roli i mësuesit - të krijojë tek ai një interes ndaj proceseve që ndodhin në natyrë, ta përfshijë në aktivitete për të mbrojtur mjedisin dhe në kontaktin e drejtpërdrejtë me bimë dhe kafshë. Pjesëmarrja e fëmijës në procesin e mbjelljes dhe rritjes së bimëve, korrjes dhe furnizimit të saj në shtëpi në të vërtetë formon sistemin e tij të vlerave dhe krijon një dëshirë për një mënyrë jetese miqësore me mjedisin”, shpjegon mësuesja e shkollës fillore Sillvia Marushkina.

Kjo është arsyeja pse klasa e saj, në një ekip me klasat e tjera fillore nga Shkolla e 81 e Mesme Inovative “Victor Hugo” në Sofje, krijoi një projekt për krijimin e një kopshti barishte në oborrin e shkollës. Ai është midis 15 të aprovuarve për mbështetje nga Fondacioni EkoCentrik dhe organizata rinore JANUN, Gjermani. “Ne jemi një nga 4 institucionet në Sofje të cilat fituan konkursin dhe jemi shkolla e vetme në kryeqytet me projekt të aprovuar – shpjegon Sillvija Marushkina. - Ideja jonë është që fëmijët të mësojnë të jenë përgjegjës për mjedisin në të cilin jetojnë. Kjo do të thotë të respektojnë veten dhe vendin e vetë në botë.”

Gjatë shekullit të kaluar pothuajse çdo shkollë në vendbanimet e vogla bullgare kishte një kopsht arsimor me perime ose me pemë frutore. Sot projekte të tilla konsiderohen inovacione, megjithëse ato realizohen pothuajse tre shekuj pas

thirrjes së Jean-Jacques Rousseau për “Kthimin në natyrë”. Dhe fëmijët urbanë të shekullit 21, rezulton se e duan natyrën dhe shpejt nxitojnë në aktivitete që lidhen me mjedisin. Puna në kopshtin shkollor ka edhe një efekt tjetër:

“Kjo është gjëja më e vlefshme që na jep kjo pjesë e vogël e natyrës në oborrin e Shkollës së 81-të Inovative - na afron. Ky kopsht krijoi një komunitet të fëmijëve, prindërve dhe mësuesve. Ai krijoi marrëdhënie miqësore mes nesh dhe u arrit një sinergji, një azhurnim i marrëdhënieve, i kohezionit, i ndarjes”, është kategorike Sillvija Marushkina.

Përgatiti në shqip: Svetllana Dimitrova

Foto: Elena Karkallanova dhe Facebook