Pesë muzikantë të njohur shqiptarë - violinistët Abigeila Voshtina dhe Visar Kuçi, Herida Duro - violë, Mario Guralumi - violonçel dhe sopranoja Besa Llugiqi, prezantuan para publikut të qytetit Stara Zagora veprat më domethënëse të kulturës shqiptare, këngët tradicionale urbane dhe popullore, si dhe muzikë bashkëkohore në koncertin “Zërat e Shqipërisë”.

Koncerti u mbajt në mbrëmjen e gjashtë të Festivalit të Artit të Operës dhe të Baletit dhe u prit me duartrokitje nga publiku, transmeton BTA. Të ftuar specialë në aktivitetin muzikor ishin ambasadorët e Shqipërisë dhe Kosovës. Ky është koncerti i parë me muzikë shqiptare që mbahet në skenën e Operës së Stara Zagorës, në kuadër të festivalit, i cili për të shtatin vit radhazi prezanton një ansambël dhomash nga Ballkani.