Një kishë ortodokse bullgare për nder të "Shën Joanit të Rilës" do të ndërtohet në Londër në vendin e kishës së mëparshme në territorin e ambasadës bullgare në kryeqytetin britanik. Në një ngjarje të organizuar posaçërisht në ambasadën tonë, e cila mblodhi shumë nga bashkatdhetarët tanë që jetojnë në ishull, ambasadori Marin Rajkov prezantoi projektin dhe nisi zyrtarisht një fushatë donacionesh, qëllimi i së cilës është mbledhja e fondeve për ndërtimin e kishës.  Në mes  të pranishmëve ishin Shkëlqesia e Tij Mitropoliti i Evropës Perëndimore dhe Qendrore Antonij dhe At Dobromir, i cili drejtoi shërbesën në kishë.

Sipas ambasadorit Rajkov, projekti i kishës është klasik. Ajo i ngjan arkitekturës së kishave të vjetra bullgare - ato në Pliska, Preslav, Veliko Tërnovo dhe Serdika. Edhe pse “Shën Joani i Rilës” do të jetë në territorin e ambasadës, leja nga autoritetet londineze ishte e nevojshme për realizimin e projektit. Kjo u arrit si rezultat i përpjekjeve aktive të përfaqësisë sonë diplomatike dhe arkitektit të tempullit.

“Projekti, autor i të cilit është një arkitekt italian, u miratua nga Këshilli i Uestminstër. Nuk ishte e lehtë, por arritëm pajtim. Kisha do të ngrihet në një pjesë qendrore të Londrës. Nuk ka asnjë kishë tjetër ortodokse përreth, përveç kësaj” - tha ambasadori Marin Rajkov para korrespondentit të BNR në Londër, Veselin Paunov.

Arkitekt i kishës bullgare “Shën Joan Rillski” është italiani nga Pulia Karllo Bugi. Zgjedhja e tij nuk është e rastësishme, pasi ai njihet për afinitetin e tij ndaj ortodoksisë dhe arkitekturës ortodokse. Ndër detyrat e vështira përpara tij ishte nevoja për të përmbushur kërkesat për ruajtjen e pamjes kulturore të zonës me kërkesat e kanunit ortodoks për dukjen e kishës nga jashtë dhe nga brenda.

“Kjo është një sfidë e madhe për arkitektin, për ndërtuesit, për të gjithë. Kjo është para së gjithash një kauzë për Bullgarinë”, theksoi Mitropoliti Antonij dhe falënderoi “të gjithë bullgarët që do të jenë pjesë e këtij projekti dhe do të ngulitin një pjesë të zemrës dhe të besimit të tyre në këtë ndërtesë”.

“Kjo fushatë donacionesh synon, mbi të gjitha, të bashkojë bullgarët në Mbretërinë e Bashkuar, t'i bëjë ata të përjetojnë me zemrat e tyre këtë ngjarje vërtet historike, sepse për 30 vjet bullgarët frekuentojnë kishën e vogël në oborrin e ambasadës dhe tani do të kenë mundësinë ta vizitojnë një tempull i bukur, i gjerë me të gjitha kërkesat e nevojshme të dizajnit të brendshëm të Kishës Ortodokse” - tha Mitropoliti Antonij.

Deri më tani për ndërtimin u grumbulluan rreth 400 mijë euro. Disa prej tyre u ndanë nga qeveria bullgare, ndërsa pjesa tjetër u dhurua nga besimtarët. Megjithatë, këto fonde rezultuan të pamjaftueshme. Prandaj At Dobromir bën një apel:

"U bëj thirrje bullgarëve në Londër dhe në Britaninë e Madhe, pse jo edhe në të gjithë botën, të ndihmojnë këtë kauzë të mirë që do të na bashkojë. Kisha është i vetmi vend në këtë botë që mund të bashkojë, sepse jemi të ndarë në hapësirën politike dhe në shoqëri. Prandaj duhet të kemi një vend i cili të na bashkojë. Pavarësisht bindjeve politike, pavarësisht gjinisë, moshës, arsimimit, ne jemi gjithmonë bashkë në kishë. Kjo është një nismë shumë e mirë bullgare në Londër.”

Teksti: Miglena Ivanova / bazuar në një reportazh të Veselin Paunov, korrespondent i BNR në Londër/

Përgatiti në shqip dhe publikoi: Svetllana Dimitrova

Foto: BTA, BNR