Këngët e Kiçka Savovës “marrin jetë” në një turne virtual kombëtar

90 vjet nga lindja e këngëtares së njohur

botuar më 24-02-22 8.45.PD

Foto: Fondacioni „Kiçka Savova“

Më 22 shkurt shënohet 90-vjetori i lindjes së Kiçka Savovës – një prej këngëtareve më të rëndësishme të krahinës folklorike trake. Të gjithë ata që e njohën gjatë jetës së saj mbajnë në zemrat e tyre kujtimin e një personi të talentuar, vërtet të mirë dhe të sjellshëm. Kiçka Savova la dhjetëra incizime për Radion Kombëtare.

Janë të shumtë interpretuesit e rinj të cilët këngëtarja arriti t’i tërheqë drejt artit folklorik, jo vetëm si mësuese, por edhe si patron i Festivalit Ndërkombëtar "Me këngët e Kiçka Savovës". I themeluar në vitin 2008, forumi ende mbledh këngëtarë të talentuar të moshave të ndryshme në fshatin e saj të lindjes, Slladun.

“Me këngët e Kiçka Savova” – një festë e vërtetë e folklorit bullgar

Fondacioni “Kiçka Savova”, i themeluar nga trashëgimtarët e këngëtares së njohur, do të festojë 90-vjetorin e lindjes së saj me disa evente. Stefka Zdravkova, kryetare e fondacionit, vajza e interpretueses, tregon për më të rëndësishmet prej tyre:

“Vendosëm që të gjithë vitin 2024 t'ia kushtojmë këtij përvjetori në mënyrë që i përgjigjet krejtësisht personalitetit të saj. Po organizojmë një turne virtual me pjesëmarrjen e studentëve të degës "Këndim popullor" në Akademinë Kombëtare të Muzikës "Panço Vlladigerov" dhe të Akademisë së Muzikës, Valleve dhe Arteve Pamore "Asen Diamandiev", si dhe të nxënësve nga dy shkollat e specializuara të muzikës në vendin tonë (Shkolla Kombëtare e Arteve Popullore “Filip Kutev” – Kotell dhe ajo në Shiroka Llëka).

Këngëtarëve të rinj u japim mundësinë të interpretojnë këngë nga repertori i nënës sime, të cilat do t'i incizojnë në video. Kudo, ideja u prit me entuziazëm nga pedagogët dhe nxënësit e tyre.”

Nderim për këngëtaren popullore Kiçka Savova në fshatin e saj të lindjes

Në vijim të misionit të tij, fondacioni vazhdon të mbështesë mbajtjen e konkursit në fshatin Slladun, në të cilin zakonisht ka rreth 1500 pjesëmarrës.

Çmimi i madh që marrin laureatët, zakonisht rreth 7 fëmijë, është pjesëmarrja në një klasë master nën drejtimin e Darina Sllavovës - një nga nxënëset e dashura të Kiçka Savovës, mësuese e këndimit popullor në Akademinë Kombëtare të Muzikës dhe soliste e ansamblit. "Trakia".

Në vitin 2023, u publikua një përmbledhje prej 20 këngësh të njohura nga Kiçka Savova - një mundësi e paçmuar për talentët e rinj “për të pirë ujë nga burimi”.

Këngët janë përpunuar për zë dhe piano nga kompozitori Georgi Andreev, drejtor i Ansamblit Folklorik Kombëtar “Filip Kutev”. Me ndihmën e Vanja Monevës, krijuese dhe dirigjente e korit me famë botërore që mban emrin e saj dhe të Darina Sllavovës, studentët nga Akademia Kombëtare e Muzikës i prezantuan në skenën e koncerteve. Këngët e kësaj përmbledhjeje do të “marrin jetë” sërish në turneun virtual kombëtar përmes performancave të studentëve dhe nxënësve, të cilët do të dëgjohen edhe në valët e mediave më të rëndësishme kombëtare.