Serbët nuk besojnë se zgjidhja e krizës politike në vend mund të jetë një “referendum konsultativ” për besimin ndaj presidentit, siç ka kërkuar kreu i shtetit, Aleksandar Vuçiq. Nëse bëhet fjalë për një referendum, 52% e qytetarëve do të votojnë mosbesimin ndaj Vuçiqit, 34% do ta mbështesin atë - sipas një studimi të Qendrës Joqeveritare për Hulumtim, Transparencë dhe Përgjegjësi (CRTA), raportoi BGNES. Qytetarët serbë kanë dyshime në lidhje me kushtet në të cilat do të mbahen zgjedhjet e mundshme të parakohshme. 61% mbështesin protestat pas shembjes së stacionit të trenit në Novi Sad, ku humbën jetën 15 persona. 57% besojnë se Serbia po lëviz në drejtimin e gabuar. 1/3 mendojnë se korrupsioni është problemi më i madh në vend. Vuçiq i propozoi opozitës që në pranverë të mbahet një referendum konsultativ për të parë mbështetjen e tij nga qytetarët.

Presidenti kroat Zoran Milanoviç fitoi raundin e dytë të zgjedhjeve presidenciale me një rezultat rekord prej 74,68% kundrejt 25,32% për kundërshtarin e tij Dragan Primorac, njoftoi agjencia HINA. I mbështetur nga Partia Social Demokratike më e madhe opozitare, Milanoviç mori 1 122 859 vota. Dragan Primorac, i mbështetur nga Bashkimi Demokratik Kroat në pushtet, mori 380 752 vota. Pjesëmarrja në votime ishte 44.18% dhe ishte pjesëmarrja më e ulët që nga ndarja e ish-Jugosllavisë. Milanoviç theksoi se ai e sheh fitoren si një njohje të punës së tij të deritanishme dhe një mesazh të fortë për qeverinë për të pasur një qeverisje të përgjegjshme. Ai tha se nuk do të bënte asnjë presion publik ndaj kryeministrit Andrej Plenkoviç, por ata do të duhet të "flasin". Plenkoviç komentoi se Milanoviç ka drejtuar një "fushatë të pistë" dhe ka pasur një "mandat të pistë".

Tarifa të reja janë vendosur për kalimin e makinave nëpër autostrada, tunele dhe ura në Turqi. Sipas NTV, çmimet e reja në 2025 do të jetë rreth 42% më të larta krahasuar me një vit më parë. Në një deklaratë të Drejtorisë së Përgjithshme të Autostradave thuhet se rritja e tarifave është ndërmarrë për shkak të inflacionit të lartë dhe luhatjeve të kursit të këmbimit, si dhe rritjes së kostos së mirëmbajtjes së objekteve. Tarifat e reja për urën "Dëshmorët e 15 Korrikut" dhe "Fatih Sulltan Mehmed" mbi Bosfor do të jenë 47 lira turke për makinë dhe 80 lira për urën "Yavuz Sultan Selim". Për Urën Osmangazi mbi Gjirin e Izmitit, tarifa është 795 lira turke. Për Urën e Çanakalasë është 790 lira. Në portalin e drejtorisë mund të gjeni çmimet e reja të tarifave.

BE-ja ka anuluar markën turistike të regjistruar në Turqi "TurkAegean" me kërkesë të Greqisë, raporton hurriyetdailynews.com. Turqia regjistroi emrin 4 vite më parë me argumentin se ashtu si Greqia ka edhe një bregdet të Egjeut. Greqia paraqiti një ankesë kundër kësaj në Zyrën e Pronësisë Intelektuale të BE-së (EUIPO). Në vendimin e saj, EUIPO vëren se emri i regjistruar përmban një emër gjeografik gjerësisht të njohur "Egje" (Aegean - në anglisht), i cili nuk mund të monopolizohet si markë tregtare, veçanërisht kur lidhet me produkte ose shërbime specifike. Athina mirëpriti vendimin për të anuluar regjistrimin, ndërsa Ministri i Zhvillimit Takis Theodorikakos e quajti atë një "arritje të jashtëzakonshme". Turqia ka dy muaj kohë për të apeluar vendimin.

Qeveria shqiptare i dha statusin e investitorit strategjik një kompanie të lidhur me dhëndrin e Donald Trump, Jared Kushner. Ajo planifikon të ndërtojë një resort luksoz në një ishull të pabanuar shqiptar në Mesdhe, që është një ish-bazë ushtarake, raportoi BTA. Komiteti Shqiptar për Investimet Strategjike, i kryesuar nga kryeministri Edi Rama, ka pranuar propozimin e kompanisë Atlantic Incubation Partners për projektin, i cili mbulon 45 hektarë, ose 8% të sipërfaqes së ishullit të Sazanit. Investimet e planifikuara arrijnë në 1.4 miliardë euro. Investimi do të krijojë 1000 vende pune. Ishulli i Sazanit ndodhet në hyrje të ngushticës së Otrantos, e cila lidh detet Adriatik dhe Jon. Ky ishull i vogël prej 5 kilometrash katrorë ishte një nga bazat ushtarake më sekrete të Shqipërisë komuniste dhe është i mbushur me mbi 3000 bunkerë.

Përpiloi: Ivo Ivanov

Foto: Facebook/ Aleksandar Vučić, Reuters, ntv.com.tr, hurriyetdailynews.com, nypost.com

Përgatiti në shqip dhe publikoi: Kostandina Bello